Die polisie in die Vrystaat ondersoek hoe ’n vliegtuig, wat Woensdagoggend deur die 22-jarige Corlia Strydom gevlieg is, neergestort en haar lewe geëis het.

Josephine Rani, polisiewoordvoerder, het gesê die oorledene het met haar Crop Spray-enkelsitplekvliegtuig by Kroonstad opgestyg vir haar finale assessering om 'n gewasbespuitingsvlieënier te word. “Omtrent 1 km van die vliegveld af het die vliegtuig neergestort en ontplof. ’n Geregtelike doodsondersoek is geregistreer en die ondersoek duur voort.” Die voorval het omstreeks 06:00 die oggend gebeur.

Sy het aan die Hoërskool Wolmaransstad gematrikuleer. Haar alma mater het sedertdien hul medelye aan die Strydom-familie betoon en bygevoeg dat haar ma ook in 'n ongeluk gesterf het. 

“In Maart 2018 het Wollies vir gebede vir Corlia Strydom en haar gesin gevra, nadat haar ma tragies in 'n motorongeluk gesterf het. En vandag het ons verneem dat Corlia haar laaste vlug op aarde geneem het. Sy het gesterf terwyl sy haar droom uitgeleef het om 'n vlieënier te word. Baie sterkte aan haar pa, broer en familie in hierdie hartseer tyd.”

Corlia Strydom het haar finale assessering gedoen om 'n gewasbespuitingsvlieënier te word toe sy verongeluk het. 

Sy was van 2015 tot 2017 'n leerder aan die Hoërskool Schweizer-Reneke in Noordwes. Die skool sluit sedertdien aan by mense wat medelye aan die familie van Strydom betoon. 

“Ons lyding in hierdie lewe is maar min en verbygaande, maar dit eindig vir ons in ’n heerlikheid wat alles oortref en vir ewig bly. Ons oog is nie gerig op die dinge wat sigbaar is nie, maar op die onsigbare; want die sigbare dinge is tydelik, maar die onsigbare ewig. Mag jou sonskynhart vir altyd deur jou geliefdes skyn,” lui hul Facebook-plasing.

Corlia Strydom was ’n student van die Potch Flight Academy.

Boodskappe stroom steeds in ná die ongeluk. Die Potch Flight Academy het ook hul hartseer oor die dood van Strydom uitgespreek. “Ons innige simpatie en innige meegevoel met die afsterwe van Corlia Strydom.”

OFM Nuus/Tshehla Koteli