Die Vrystaatse polisie soek na verdagtes nadat ’n 50-jarige man in Phuthaditjhaba vermoor is.

Die man is by sy huis in Bluegumbosch deur twee onbekende mans doodgeskiet. Mmako Mophiring, polisiewoordvoerder in die Vrystaat, sê die oorledene het Maandag (16/10) omstreeks 12:30 'n muur saam met twee ander mans by sy huis gebou. Hulle het na bewering twee mans opgemerk wat blou en goue oorpakke gedra het en hul gesig met klapmusse bedek het.      

’n 50-jarige man is in Phuthaditjhaba doodgeskiet.

Die twee verdagtes het opgetree asof hulle die huis van die slagoffer wou verbygaan. Hulle het egter skielik skote in die rigting van die slagoffer, messelaar en ander mans afgevuur wat na die agterkant van die huis gevlug het. Hulle is later terug na voor en het opgemerk dat die huiseienaar (slagoffer) op die grond lê met bloed wat sy hele bolyf bedek het.

Mophiring sê die oorledene se suster, Mofumahadi Mthimkhulu, het hom as haar broer, Paseka, geïdentifiseer. 

Die motief vir die moord is nog onbekend. Enigiemand met inligting wat kan help met die inhegtenisneming van die verdagtes word versoek om Phuthaditjhaba se speurders by 079 889 3311 te bel.

OFM Nuus/Kekeletso Mosebetsi