Die Noordwes Departement van Openbare Werke en Paaie doen ’n beroep op wetstoepassingsagentskappe om op te tree teen oortreders wat na bewering amptenare geïntimideer en gedreig het.

’n Groep mans het by die provinsiale kantoor opgedaag en geëis om van die amptenare te sien. Dié mans het na bewering 'n ketting en slotte gedra in 'n poging om die gebou te sluit. Lerato Gumbi, departementele woordvoerder, sê hulle het subkontrakte vir die sny van gras geëis.

“Individue eis gereeld sakegeleenthede in die algemeen of om deel te wees van die grassny-projek en dit voldoen nie aan die vereistes van die munisipaliteit nie.”

Die voorval het ’n negatiewe invloed gehad op bedrywighede by die provinsiale kantoor in Mahikeng omdat werknemers en gemeenskapslede nie in die gebou kon kom nie.

Moss Kgantsi, hoof van die departement, sê hierdie dreigemente kan nie ligtelik opgeneem word nie. Die oortreders beledig amptenare en dring aan om vergaderings te hou wat nie geskeduleer is nie. Die aangeleentheid is by die betrokke owerhede aangemeld.

OFM Nuus