Inwoners wat op ’n plaas tussen Ficksburg en Fouriesburg in die Vrystaat woon, oorleef sedert 2008 sonder elektrisiteit.

Een van die inwoners wat na OFM Nuus uitgereik het, Frank Lenyatso, sê daar is verskeie pogings deur inwoners aangewend om elektrisiteit terug te kry, maar niks het gerealiseer nie. 

In een van die jare het hulle ’n vreedsame optog na die Setsoto-munisipaliteit onderneem, waar hulle ’n polisiestasiebevelvoerder ontmoet het wat met hulle simpatie het. “Die stasiebevelvoerder het belowe om ons te help om na die munisipaliteit uit te reik vir hulp, maar hy het intussen stil geword.”

’n Brief is tydens die vreedsame optog aan die amptenare van die munisipaliteit oorhandig en die munisipaliteit het belowe hulle sal die kwessies binne 14 werkdae hanteer. Maande het egter verbygegaan sonder dat enige kommunikasie aan die inwoners gebied is. Die stasiebevelvoerder het ook vir ’n maand gevra om ’n manier te vind om die inwoners met elektrisiteit te help, wat nou verby is.

“Dit breek ons hart want dit is al 15 jaar wat ons vir een ding veg – elektrisiteit –maar niks slaag ooit nie. Ons laaste hoop was die stasiebevelvoerder want nou is dit ver vir ons om na die munisipaliteit te reis en finansieel is dit moeilik vir ons om daar uit te kom.”

Terwyl OFM Nuus wag op ’n antwoord van die munisipaliteit oor die elektrisiteitskwessie, is daar gebiede waarvoor die munisipaliteit verantwoordelik is wat blykbaar al ’n ruk lank sukkel met watervoorsieningsprobleme. Daar was verskeie plasings op die munisipaliteit se amptelike Facebook-bladsy oor watertoevoeronderbrekings weens lekkasies, waterpypherstelwerk, of waterpype wat gebiede verbind. Lenyatso en inwoners op die plaas sukkel egter nie met water nie.

OFM Nuus/Tshehla Koteli