Ses vermeende kabeldiewe van Kimberley het Donderdag (9/11) hul moses teëgekom toe hulle danksy op-en-wakker buurtwaglede in Bloemfontein aangekeer is.

AfriForum Bloemfontein sê op sy Facebook-blad inligting is van ’n misdaadvoorkomingsplatform ontvang dat ’n voertuig met insittendes, wat betrokke is by kabeldiefstal, onderweg is na Bloemfontein. Die verdagtes word aan kabeldiefstal in Kimberley verbind.

Die rooi Toyota Yaris waarin die vermeende kabeldiewe opgemerk is. Foto: AfriForum Bloemfontein/Facebook

Een van AfriForum Fichardtpark se buurtwagpatrolleerders het die voertuig, ’n rooi Toyota Yaris, op die N8-hoofweg opgemerk, en die inligting is met AfriForum Bloemfontein se WhatsApp-groep gedeel. Lede van verskeie AfriForum-buurtwagte in die stad het gereageer, sowel as die polisie, Transnet en die gewapendereaksie-eenheid van die VR-sekuriteitsmaatskappy.

Die toneel waar die rooi Toyota Yaris voorgekeer en ses vermeende kabeldiewe in Bloemfontein in hegtenis geneem is. Foto: AfriForum Bloemfontein/Facebook

Die voertuig is voorgekeer en die ses insittendes is op die toneel in hegtenis geneem, waarna hulle deur die polisie na die Parkweg-polisiekantoor geneem is vir verder ondersoek en om hul betrokkenheid by georganiseerde misdaad te bepaal.

Sosialemediagebruikers het hul tevredenheid uitgespreek en die betrokkenes gelukgewens met hul vinnige optrede.

OFM Nuus/Christine van der Westhuizen Corné/Morné