Adeyefa Adedamola Adetoye (38) van Nigerië is borgtog geweier deur die Kimberley-streekhof nadat twee vroue in sy hotelkamer gekry is. Hulle is glo as sekswerkers misbruik.

Mojalefa Senokoatsane, NVG-woordvoerder, sê die individu word beskuldig van mensehandel, aanranding, verkragting, gedwong verkragting, besit van onwettige dwelms, asook die feit dat hy ’n onwettige immigrant is.

“Tydens die aanhouding by ’n Kimberley-motel is twee slagoffers, ’n 17-jarige meisie en ’n 29-jarige vrou, in sy kamer gevind,” sê Senokoatsane.

Hy sê hulle het aan die polisie gesê dat hulle van Johannesburg na Kimberley is, waar hulle in die hotelkamer gevange gehou is en gedwing is tot prostitusie deur die beskuldigde. Onwettige dwelms is ook tydens die soektog in die beskuldigde se kamer aangetref.

Tydens die borgtogaansoek het die hof geleer dat die beskuldigde, oorspronklik van Nigerië, sonder geldige dokumentasie in Suid-Afrika is aangesien sy permit in 2018 verval het.

“Daar is ook opgemerk dat hy nie 'n vaste adres gehad het en 'n potensiële vlugrisiko ingehou het. Die hof is bewus gemaak van die slagoffers se ervarings, wat beskryf hoe hulle deur die beskuldigde gelok en uitgebuit is vir seksuele werk op verskillende plekke,” vertel hy.

Die saak is uitgestel tot 30 Januarie 2024 en die beskuldigde sal in aanhouding bly tot die volgende hofdatum.

OFM Nuus/Heidrè Malgas Corné