Twee buitelanders kom na verwagting Vrydagoggend (4/1) in die Sasolburgse landdroshof voor vir die besit van ’n gesteelde voertuig nadat hulle na bewering ’n klein sedan gekaap het.

Lede van Sasolburg se hoofwegpatrollie het die R82 in die rigting van Viljoensdrift Dinsdag kort voor middernag gepatrolleer toe hulle ’n wit Kia Picanto sonder nommerplate gewaar, sê Josephine Rani, Vrystaatse polisiewoordvoerder.

‘Die twee verdagtes bly in aanhouding’

Die wetstoepassers het die twee mans, van 32 en 42 jaar, voorgekeer. Die voertuig is deursoek, toe hulle afgekom het op die ontbrekende nommerplate en ’n speelgoedgeweer. Tydens ’n navraag oor die nommerplate is vasgestel die voertuig is in Kliprivier in die suide van Gauteng gekaap.

Die twee verdagtes is in hegtenis geneem en bly in aanhouding tot hulle Vrydag voorkom vir die besit van ’n vermoedelik gesteelde voertuig.

OFM Nuus