Skoolbeheerliggame in Noordwes word versoek om verskaffersmonopolieë stop te sit wat verregaande pryse vra vir uniforms wat duur is vir minderbevoorregtes.

“Die beginpunt moet wees om basiese uniforms vir openbare skole voor te skryf en bemagtigingsgeleenthede vir KMMO’s en koöperasies wat in armer gemeenskappe geleë is, te skep,” het Lesiba Kgwele, sameroeper van die Moral Regeneration Movement, gesê.

“Openbare skole moet die versoeking weerstaan om eksklusiwiteitsbeleide te volg wat deur die meeste privaat skole gevolg word.”

‘Ouers moet kinders se opvoedkundige reis ondersteun’

Kgwele het ouers voorts aangemoedig om hul kinders se opvoedkundige reis te ondersteun deur aktiewe deelname aan skoolprogramme, insluitend hul studies vanaf die eerste dag van die skooljaar.

Intussen het Viola Motsumi, Noordwes-LUR vir onderwys, nuutgeboude skole dwarsoor die provinsie besoek om te kyk of hulle gereed is vir die heropening van skole volgende week.

Sy het ’n skool in Ikageng by Potchefstroom deels oorhandig wat meer as 700 leerders vir gr. 8 en 9 sal akkommodeer. Die skool sal na verwagting teen die einde van die eerste kwartaal voltooi wees.

LUR Viola Motsumi besoek ’n nuwe skool in Noordwes. Foto verskaf

Skole in Sentraal-SA open Woensdag (17/1) vir die nuwe akademiese jaar. 

OFM News/ Zenande Mpame mc