Die Onafhanklike Verkiesingskommissie (OVK) in die Vrystaat het gesê hulle is gereed vir die finale registrasienaweek voor vanjaar se verkiesing.

Altesaam 1 586 registrasiestasies in die provinsie sal hierdie naweek (3 en 4 Februarie 2024) van 08:00 tot 17:00 vir voornemende kiesers oop wees.

“Ons moedig 16-jariges en ouer, stemgeregtigde kiesers aan om in hul getalle te kom registreer. Tans het ons sowat 1,4 miljoen kiesers op ons kieserslys in die Vrystaat en ons verwag om meer as dit te hê. Ons moedig jou aan om asseblief te onthou om jou ID ('n slimkaart of groen strepieskode-ID) of 'n tydelike ID-sertifikaat saam te bring,” het die OVK-woordvoerder in die Vrystaat, Mmabatho Rasengani, gesê.

Rasengani het inwoners daaraan herinner om te registreer in ’n wyk waar hulle woon of een naby hul woongebied. Sy het inwoners ook versoek om ’n behoorlike bygewerkte adres te verskaf sodat hulle op die kieserslys geplaas kan word.

Die OVK se nasionale woordvoerder, Kate Bapela, het gesê die eerste registrasienaweek in November 2023 was ’n sukses, met meer as 2,9 miljoen Suid-Afrikaners wat geregistreer is of hul besonderhede opgedateer het. Altesaam 23 303 registrasiestasies regoor die land sal weer oop wees sodat kiesers finaal hul besonderhede kan nagaan voor die verkiesing.

Die Departement van Binnelandse Sake sal werksure op Vrydag 2 Februarie 2024 van 16:00 tot 18:00 verleng, wat landsburgers in staat sal stel om identifikasiedokumente voor die finale kiesersregistrasienaweek te bekom. Kantore sal ook vir ’n verlengde tydperk van nege uur op Saterdag en Sondag oop bly, van 08:00 tot 17:00, om Suid-Afrikaners wat hul ID afhaal tegemoet te kom.

OFM Nuus/Kekeletso Mosebetsi cg