Wêreld-outismebewustheidsdag, wat elke jaar op 2 April gevier word, wil bewustheid oor outismespektrumversteuring (OSV) verhoog en begrip en aanvaarding van individue met outisme bevorder.

Blaize Akademie, geleë in Bloemfontein, bied reeds nege jaar gespesialiseerde ondersteuning aan outistiese kinders. Dié akademie, wat ontstaan uit die unieke behoeftes van hierdie kinders, bied omvattende hulp oor verskeie domeine.

Dr. Marinda Raubenheimer, skoolhoof en ’n spraak-en-taalterapeut by Blaize Akademie, beklemtoon die belangrikheid van Nasionale Outismedag in die bewusmaking van outisme se kompleksiteite. Die dag dien as ’n geleentheid om mense op te voed oor die uiteenlopende kenmerke van outisme en hoe om individue op die spektrum effektief te ondersteun.

Raubenheimer, met kundigheid in kommunikasie-intervensie vir outistiese kinders, beklemtoon die individualiteit van elke kind met outisme en verduidelik dat elke persoon met outisme oor eiesoortige sterkpunte en uitdagings beskik.

“Daar was oor die afgelope paar jare ’n merkbare toename in die aanvaarding van mense met outisme, en ek wil graag hê dat mense nie outisme as ‘n versteuring moet sien nie,” sê Raubenheimer.

Sy verduidelik dat outisme as gevolg van ’n neuro-ontwikkelingsteuring is, maar dat sy dit eerder beskou as ’n “andersheid”.

Met die begrip dat outisme ’n breë spektrum omvat, beklemtoon Raubenheimer die belangrikheid van die verskaffing van ondersteuning om die spesifieke behoeftes van elke individu aan te spreek, eerder as om dit op grond van funksioneringsvlakke te kategoriseer.

Die identifisering van outisme by kinders kan verskeie tekens en gedrag behels:

1. Sosiale-interaksie-uitdagings

2. Kommunikasieverskille

3. Herhalende gedrag

4. Sensoriese sensitiwiteite

5. Sukkel met veranderinge

OFM Nuus/Charné van der Merwe