Die 24-uur-gesondheidsdienste by die Galeshewe-daghospitaal in Kimberley, wat weens ’n tekort aan personeel en toerusting nie as ’n 24-uur-hospitaal kon funksioneer nie, is heringestel.

Die fasiliteit het onlangs weer begin om dag en nag primêre gesondheidsorgdienste te lewer, wat nou nooddienste insluit. Ambulanse, toegewyde personeel van die Galeshewe-daghospitaal, insluitend dokters, gaan nou selfs na-ure beskikbaar wees om pasiënte te help. Dit is ter voorbereiding vir die komende implementering van die langverwagte Nasionale Gesondheidsversekeringsprogram.

Ontvangsarea. Foto verskaf

“Die departement wil die mense van Sol Plaatje aanmoedig om toegang te verkry tot die omvattende pakket dienste wat aangebied word,” het Maruping Lekwene, LUR vir Gesondheid, gesê. “Hierdie instelling is bedoel om primêre gesondheidsorg-pasiënte tydelik na die tersiêre inrigting te verwys en wagtye by ons geriewe te verminder. Belangriker nog, om toegang tot gesondheidsorg op ’n groeiende skaal aan alle mense te verskaf.”

Lekwene, saam met Mxolisi Mlatha, waarnemende departementshoof, sal na verwagting volgende week die instelling besoek vir ’n wandeling en interaksie met personeel en pasiënte.

Die hospitaal is twee jaar gelede opgeknap toe dit voorsien is van ’n meer moderne liasseerstelsel, ’n biometriese pasiëntbestuurstelsel, ’n opgedateerde kaartjiewagstelsel sowel as nuwe TV’s.

OFM Nuus/Casey-Lee Anthony cg

Sien fotogalery van Galeshewe-daghospitaal se opgeknapte rekordbestuurseenhede: