Click on the warning image to view this post
Central SA
Bloemfonteiner in hegtenis ná hy hond lewend brand─── CHARNÉ VAN DER MERWE 14:58 Fri, 31 May 2024
“Die man, wat glo onder die invloed was, het komberse en kussings van sy familie gevat, dit aan die brand gesteek en die hond in die vlamme gegooi.”
(DIE ARTIKEL BEVAT INHOUD WAT NIE VIR SENSITIEWE MENSE GESKIK IS NIE.)
’n Man van Bloemfontein is in hegtenis geneem ná hy ’n hond lewend aan die brand gesteek het.
Die Bloemfonteiner (18) is Vrydag (31/5) deur die polisie se honde-eenheid in hegtenis geneem nadat hy die gesinshond, wat nog gelewe het, in brandende komberse gegooi het.
Twee inspekteurs van Bloemfontein se DBV, Werner Botha en Lucky Olifant, het Maandag ’n saak van dieremishandeling aanhangig gemaak nadat hulle deur lede van New Beginnings, ’n dierereddingsentrum, oor die voorval in Roodewal in kennis gestel is.
Sers. Tebogo Mohokare van die Navalsig-polisiekantoor het aan OFM Nuus bevestig dat die verdagte in aanhouding is en ’n polisiedossier geopen is. “Die man, wat glo onder die invloed (van drank) was, het komberse en kussings van sy familie gevat, dit aan die brand gesteek en die hond in die vlamme gegooi.”
Die verbrande hond. Foto verskaf
Botha sê dit is “een van die aakligste gevalle wat ek al gesien het. Ek sal nooit kan verstaan waarom mense besluit om diere te martel of seer te maak nie. Die ergste is dat die man, wie se hond dit was, sy laaste kombers gebruik het om die hond in toe te draai.”
Die gesin het op die oomblik geen komberse nie en Botha vra die publiek se hulp om die gesin by te staan met kussings, komberse en kos. “Ja, ons is daar vir diere, maar ons moet nooit ons menslikheid vergeet nie,” het Botha bygevoeg.
Indien jy met ’n skenking wil help, kan dit by die Bloemfontein DBV óf New Beginnings afgelaai word.
Bloemfontein se DBV wil graag New Beginnings en die polisie bedank wat hulle met hierdie saak bygestaan het.
Die verbrande hond. Foto: verskaf
In 2021 is West Scheepers (39) in die Bloemfonteinse landdroshof aan dieremishandeling skuldig bevind nadat hy ’n Amerikaanse veghond wreedaardig met ’n panga aangeval en toe aan die brand gesteek het. Hy is met R2 000 beboet of ses maande tronkstraf opgelê.
Hy het die hond, Oscar, herhaaldelik met ’n panga geslaan. Scheepers het ook paraffien oor Oscar uitgegooi en die hond aan die brand gesteek.
Oscar het die aanval oorleef, maar moes kort daarna weens die omvang van sy beserings uitgesit word.
