(DIE BERIG BEVAT INHOUD WAT NIE VIR SENSITIEWE LESERS GESKIK IS NIE.)

Die Bloemfonteinse man wat in hegtenis geneem is, nadat hy ’n hond lewend aan die brand gesteek het, se saak is vir verdere ondersoek uitgestel.

Die beskuldigde het Maandag (3/6) in Bloemfontein se landdroshof verskyn, maar weens onvoldoende bewyse is die saak nie weer op die rol geplaas nie. “Die saak is nie teruggetrek nie, maar die verdagte is vrygelaat. 

“Ná verdere ondersoek sal die nodige bewyse teruggestuur word aan die aanklaer, wat sal besluit of hy weer ’n dagvaarding vir die beskuldigde se inhegtenisneming gaan uitreik,” sê ao. Tebogo Mohokare van die Navalsig-polisiekantoor.

Die 18-jarige is Vrydag (31/5) deur die polisie se honde-eenheid in hegtenis geneem, nadat hy die gesinshond, wat nog gelewe het, in brandende komberse gegooi het.

Die hond het nie die wrede behandeling oorleef nie. Foto verskaf

Twee inspekteurs van Bloemfontein se DBV, Werner Botha en Lucky Olifant, het Maandag ’n saak van dieremishandeling aanhangig gemaak, nadat hulle deur lede van New Beginnings, ’n dierereddingsentrum, oor die voorval in Roodewal in kennis gestel is.

Volgens Mohokare was die beskuldigde onder die invloed (van drank) toe hy komberse en kussings van sy familie gevat het, dit aan die brand gesteek en die hond in die vlamme gegooi het.

‘Die ergste is dat die man sy laaste kombers gebruik het’

Botha sê dit is “een van die aakligste gevalle wat ek al gesien het. Ek sal nooit kan verstaan waarom mense besluit om diere te martel of seer te maak nie. Die ergste is dat die man, wie se hond dit was, sy laaste kombers gebruik het om die hond in toe te draai.”

Die gesin het op die oomblik geen komberse nie en Botha vra die publiek se hulp om die gesin by te staan met kussings, komberse en kos. “Ja, ons is daar vir diere, maar ons moet nooit ons menslikheid vergeet nie,” het Botha bygevoeg.

Die hok waarin die hond dood is. Foto verskaf

In 2021 is West Scheepers (39) in die Bloemfonteinse landdroshof aan dieremishandeling skuldig bevind, nadat hy ’n Amerikaanse veghond wreedaardig met ’n panga aangeval en toe aan die brand gesteek het. Hy is met R2 000 beboet of ses maande tronkstraf opgelê.

Hy het die hond, Oscar, herhaaldelik met ’n panga geslaan. Scheepers het ook paraffien oor Oscar uitgegooi en die hond aan die brand gesteek.

Oscar het die aanval oorleef, maar moes kort daarna uitgesit word weens die omvang van sy beserings.

OFM Nuus mvh