Die internet bied kinders en tieners toegang tot ’n groot hoeveelheid inligting en sosiale verbindings deur platforms soos sosiale media, e-pos, en boodskappe. Maar dit hou ook die gevaar in van misdadigers wat op kinders wil toeslaan.

“Ouers moet waaksaam wees oor hul kinders se aanlyn-aktiwiteite,” sê Mike Bolhuis, privaat speurder.

Hy noem die volgende tekens wat daarop kan dui dat jou kind aanlyn geteiken word:

Geheimsinnigheid oor toestelle

As jou kind skielik geheimsinnig raak oor hul telefoon- of rekenaargebruik, kan dit aandui dat hulle iets wegsteek.

Gedragsveranderinge

Opvallende buie wat verander, soos verhoogde angs, depressie, of prikkelbaarheid, is ook ’n gevaarteken.

Grafika: iStock/Media24

Nuwe vriende

Dit is die moeite werd om ondersoek in te stel as jou kind nuwe vriende noem wat jy nog nie ontmoet het nie, veral ouer vriende.

Ongewone aktiwiteit 

Let op vir onverklaarbare veranderinge in jou kind se aanlyn-aktiwiteite, soos om toestelle laat in die nag te gebruik of nuwe sosialemediarekeninge te skep.

Onttrekking van familie 

’n Kind wat hom van gesinsaktiwiteite onttrek of ongewoon verdedigend raak oor hul aanlyn-interaksies, kan onder die invloed van ’n kuberboelie of kubermisdadiger wees.

Grafika: Facebook

Onmiddellike stappe om te neem as jy vermoed dat jou kind aanlyn agtervolg word:

Kontak die owerhede

Registreer onmiddellik ’n saak by die polisie of plaaslike wetstoepassingsagentskap.

Beveilig toestelle

Beperk toegang tot alle toestelle en verander wagwoorde om verdere kontak te voorkom.

Monitor en onderrig

Hou jou kind se aanlyn-aktiwiteite fyn dop en hou aan om hulle in te lig oor die gevare van die deel van persoonlike inligting aanlyn.

Stel skole en versorgers in kennis

Sorg dat jou kind se skool en versorgers bewus is van die situasie en vra hulle om ekstra toesig te hou.

Grafika: NewsHealth.net

Hoe om jou kind verder te beskerm:

Volg die saak op

Bly in aanraking met die owerhede en verseker dat hulle jou saak opvolg. Vra uit oor gespesialiseerde eenhede wat fokus op kubermisdaad en kinderbeskerming.

Voed jou kind op en bemagtig hom

• Soek werksessies of praatjies oor aanlynveiligheid in jou omgewing, veral dié wat handel met die gevare van aanlyn misdadigers.
• Skole of gemeenskapsentrums bied dikwels hierdie hulpbronne aan.

Teenwoordigheid

• Hersien jou kind se sosialemediarekeninge en sluit enige onnodige rekeninge of rekeninge wat ’n risiko inhou.
• Oorweeg dit om ouerbeheersagteware te gebruik om aanlyn-aktiwiteite te monitor en jou oor moontlike gevare te waarsku.
• Wees versigtig met wie jy persoonlike inligting deel en verseker dat adresse, telefoonnommers en ander sensitiewe besonderhede nie maklik toeganklik is nie.

Samewerking met skole

• Bespreek die situasie met jou kind se skool en verseker dat hulle bewus is van die risiko’s.
• Hulle kan help deur ekstra toesig te verleen of spesiale reëlings vir jou kind se veiligheid te tref.

Emosionele ondersteuning

• Moenie die emosionele bagasie wat sulke situasies op ’n kind laai, vergeet nie.
• Professionele berading sal voordelig wees as jou kind tekens van spanning wys.

OFM Nuus/Heidrè Malgas mvh/cg