Central SA
Nog kanker by Sasolburgse tiener ontdek─── HEIDRÈ MALGAS 08:04 Thu, 05 Sep 2024
“Die kanker is aggressief, maar nie aggressief genoeg om te opereer nie.”
’n Skoolmeisie van die Vaaldriehoek moet weer in November in Bloemfontein ’n CT-skandering laat doen nadat dokters twee nuwe kankerkolle aan haar regter-eierstok ontdek het.
Eierstokkanker is in Februarie by Carien van Dalen (16) gediagnoseer. “Haar dokters het besluit om nie te opereer nie,” sê haar ma, Chrissie Jacobs, ná hul jongste besoek aan die Vrystaatse hoofstad. “Hoewel die kanker aggressief is, is dit nie aggressief genoeg om te opereer nie.”
Hulle moet die volgende drie maande elke maand van Sasolburg af terug Bloemfontein toe gaan vir bloedtoetse, waar hulle die tumortelling dophou. “As dit vererger, sal hulle moet opereer,” vertel Jacobs.
Eierstokkanker is in Februarie by Carien van Dalen (16) gediagnoseer. Foto: Heidre Malgas
Carien kan nie voortgaan met chemoterapie nie. “Ons is hartseer oor die twee nuwe kankerkolle aan haar regter-eierstok wat bietjie aggressief is. Ons verstaan egter dat sy nie kan voortgaan met haar behandeling nie, want haar lyfie werk nie meer saam met die chemoterapie nie.”
’n Kankergewas van 7 kg is in Januarie van dieselfde eierstok verwyder. Sy is op 2 Februarie ontslaan en drie weke later het hulle teruggekeer na die Universitas-hospitaal vir haar opvolgbesoek.
“Daardie dag het ons die slegte nuus gekry dat dit eierstokkanker was en dat hulle een eierstok moes verwyder. Ongelukkig moes Carien chemoterapie kry,” het haar ma vroeër aan OFM Nuus vertel.
Carien van Dalen voor haar operasie om die gewas van 7 kg te verwyder. Foto verskaf
Carien bly optimisties en haar advies aan ander tienermeisies wat deur soortgelyke situasies gaan, is om positief te bly en in God te glo omdat Hy getrou is.
“My familie is my grootste ondersteuners in hierdie tyd, veral my boetie (JJ Fry). Hy is die beste deel daarvan, en ek is seker as hy saam met my by die hospitaal kon gewees het, sou hy. Hy is my rots.”
Carien en haar ma moet op 2 Oktober, 30 Oktober en 7 November terug Bloemfontein toe gaan, maar vra vir donasies vir die reiskoste en ander uitgawes.
Die gesin het begin om geld in te samel om die mediese uitgawes te dek.
