Bloemfontein en gebiede langs die Lesotho-grens kan self ’n skerp daling in temperature verwag vanaf Saterdag (3/5), sê Julius Mahlangu, Suid-Afrikaanse Weerdiens (SAWS). “Die kwik in Bloemfontein sal skaars ’n hoogtepunt van 16°C gedurende die dag bereik.”

Hy sê reën word ook Vrydag (9/5) in die sentrale dele van die provinsie verwag, wat bydra tot die koue toestande.

Maar dis nie net die koue wat inwoners op hul hoede het nie – die SAWS het ook gewaarsku teen hewige donderstorms met moontlike hael, wat kan lei tot gelokaliseerde oorstromings in die oostelike dele van Noordwes, die verre oostelike Vrystaat en Gauteng, sowel as die suidelike en sentrale dele van Mpumalanga.

Foto ter illustrasie: iStock

Mahlangu sê die eerste ryp van die seisoen kan verwag word oor die sentrale en suidelike Vrystaat en gebiede wat aan Lesotho grens. “Munisipaliteite wat waarskynlik geraak sal word, sluit in Kopanong, Mangaung Metro, Mantsopa, Masilonyana, Mohokare en Setsoto. In sommige van hierdie gebiede kan temperature effens onder vriespunt daal.”

Hy sê inwoners word aangeraai om voorsorgmaatreëls teen die koue te tref, insluitend om warm aan te trek en blootstelling aan strawwe weerstoestande te beperk. Boere word ook aangemoedig om voor te berei deur beide diere en gewasse teen die ryp te beskerm.

“Ons doen ’n beroep op alle gemeenskappe om warm en veilig te bly soos koue toestande intree. Boere word veral aangeraai om voorsorgmaatreëls te tref om die welstand van hul vee en produkte te verseker,” sê Zimasa Mbewu van die Vrystaatse Departement van Samewerkende Regering en Tradisionele Sake en Menslike Nedersettingskommunikasie.

OFM Nuus cg