Hierdie statistieke is bevestig deur die nasionale departement van vervoer. Die drukker was sedert 5 Februarie buite werking, wat gelei het tot ’n beduidende nasionale agterstand in rybewysuitreikings.

Woordvoerder Collen Msibi sê die drukker is herstel en weer in werking. “Die stilstand het egter ’n agterstand van 747 748 rybewyse veroorsaak wat nog gedruk moet word. Gauteng beleef die ergste vertragings.”

Agterstandsyfers per provinsie

• Gauteng: 252 745
• KwaZulu-Natal: 115 020
•  Wes-Kaap: 108 402
•  Mpumalanga: 66 833
•  Limpopo: 61 769
•  Oos-Kaap: 55 393
•  Noordwes: 39 983
•  Vrystaat: 33 741
•  Noord-Kaap: 13 862

Om die agterstand uit die weg te ruim, sal amptenare by die rybewyskaartagentskap langer ure werk, sê Msibi. “Die departement het ’n inhaalplan ingestel en het hulle daartoe verbind om die publiek op hoogte te hou van vordering.

Gauteng beleef die ergste vertragings. Foto: OFM Nuus

“Tog merk amptenare op dat die opruiming van die agterstand ook sal afhang van die hoeveelheid nuwe rybewysbestellings wat daagliks ontvang word.”

Suid-Afrika het lank staatgemaak op ’n enkele, verouderende rybewysdrukker, wat tot herhaalde diensonderbrekings gelei het.

OFM Nuus het voorheen berig dat die masjien die afgelope paar jaar 159 keer onklaar geraak het, wat die departement ongeveer R21 miljoen aan herstelwerk die afgelope vyf jaar uit die sak gejaag het.

Onwettige tenderproses

Ten spyte van voortdurende probleme bly die land afhanklik van hierdie verouderde stelsel. Vroeër vanjaar het die oudit.genl. bevind die tenderproses om ’n nuwe drukker aan te skaf, was onwettig. 

Regsprosedures is tans aan die gang, wat beteken dat die huidige masjien vir die afsienbare toekoms in gebruik sal bly.

By navrae het die departement aan OFM Nuus gesê enigiemand wat geraak word deur die huidige agterstand in die druk van rybewyse sal nie sonder ’n geldige rybewys gelaat word nie.

Aansoekers word aangemoedig om amptelike opdaterings dop te hou. Foto: OFM Nuus 

Mense wat tydelike lisensies het wat binnekort verval voordat hul permanente rybewys gereed is, sal nuwe tydelike lisensies kan ontvang om wettig gelisensieer te bly.

Die departement raai diegene wat geraak word aan om hul plaaslike lisensiekantoor te besoek voordat hul huidige tydelike lisensie verval om ’n hernuwing of verlenging aan te vra. Dit verseker dat bestuurders aan die wet voldoen terwyl die drukkerprobleem opgelos word.

Aansoekers word ook aangemoedig om amptelike opdaterings dop te hou of die departement direk te nader vir die nuutste inligting.

OFM Nuus mvh