Nadat ’n Facebook-video oor die Kuruman-hospitaal hierdie week op sosiale media versprei is, is die DA aangespoor om die hospitaal te besoek en die skokkende toestande by die Menseregtekommissie (MRK) aan te meld, sê Braam van der Westhuizen, DA-raadslid vir die Ga-Segonyana Munisipaliteit.

“Met my aankoms daar was dit duidelik dat die regte van pasiënte en werkers om gesondheidsorg in ’n veilige en geskikte omgewing te ontvang en te verskaf, ernstig geskend word.”

Van der Westhuizen sê pasiënte het gekla dat hulle dae lank op komberse op die koue vloer moet sit en wag net om aandag te kry.

Vullis lê die hospitaal vol. Foto verskaf

“Die sale is oorvol, met pasiënte wat op trolliebeddens in die gange lê. Sommige word selfs gedwing om op matrasse op die vloer te slaap.”

Volgens hom het een pasiënt hom ’n drup in haar arm gewys wat twee dae lank nie hervul is nie.

“Een van die verpleegsters het genoem dat sy ’n masker dra weens die hoë aantal TB-pasiënte in die oorvol hospitaal. Dit skep gevaarlike werksomstandighede. Ten spyte van die hoërisiko-omgewing, is maskers nie aan pasiënte verskaf nie,” sê Van der Westhuizen.

Hy voeg by dat ’n baba in die kraamsaal sonder toesig op ’n masjien gehuil het. “Die masjien is van die grond af opgelig, en die baba kon maklik geval en ernstig beserings opgedoen het.”

Van der Westhuizen sê die mediese voorraadwinkel is ook wawyd oop gevind, sonder personeel teenwoordig. “Dit hou ’n ernstige risiko vir die diefstal van medikasie in.”

Nog ’n ontstellende situasie was die teenwoordigheid van vullis regoor die perseel. “Dit het leë bokse en gebruikte brandwondverbande ingesluit wat nie weggegooi is nie. Die tuin was oorgroei en verwaarloos, en is as ’n stortingsterrein gebruik.”

Een pasiënt se drup aan haar arm was glo twee dae lank nie hervul nie. Foto verskaf

Verlede jaar het die DA-woordvoerder oor gesondheid, Isak Fritz, die swak toestande by die Kuruman-hospitaal tydens ’n vorige inspeksie uitgelig.

“Dit is diep teleurstellend dat die Noord-Kaapse Departement van Gesondheid nie daarin geslaag het om hierdie kwessies ’n jaar later aan te spreek nie – ten spyte van die beloftes wat deur die distrik- en hospitaalbestuurder gemaak is,” sê Van der Westhuizen.

Hy verklaar dat voortgesette pogings deur die provinsiale gesondheidsdepartement, en selfs die premier, om die toestand van gesondheidsorg in die provinsie as bevredigend uit te beeld, blatante leuens is.

“Die DA het ons bevindinge amptelik aan die SAMRK gerapporteer. Ons hoop dat dit die provinsiale gesondheidsdepartement sal dwing om sy ernstige tekortkominge in gesondheidsorg te erken en dringend aan te spreek deur die ingryping van die SAMRK.”

OFM Nuus het navrae aan die Noord-Kaapse Departement van Gesondheid gerig rakende die toestande by Kuruman-hospitaal.

OFM Nuus/Charne van der Merwe cg