Kamogelo Baukudi (19) is op 5 Junie omstreeks 12:00 in Vereenigingrylaan in Ehrlichpark ontvoer. 

Twee mans, wat hulle na bewering as polisiebeamptes voorgedoen het, het die voertuig voorgekeer waarin Kamogelo gery het. Sers. Nzima Adoons (42) het Dinsdag (24/6) in die Bloemfonteinse landdroshof verskyn op aanklagte van ontvoering en afpersing.

Die Vrystaatse premier, MaQueen Letsoha-Mathae, en brig. Motantsi Makhele in die hof. Foto: Zenande Mpame

Adoons sou na verwagting om borgtog aansoek gedoen het, maar die saak is tot Maandag (30/6) uitgestel nadat sy regsverteenwoordiger, Adriaan van Rensburg, die hof meegedeel het dat die klagstaat Sondag (22/6) deur die staat gewysig is.

Die wysiging het die borgtogaansoek herklassifiseer van ’n skedule 1- na ’n skedule 5-saak. “Hiervoor het ons ’n advokaat aangestel om die borgtogaansoek te hanteer.”

Baukudi, ’n gr. 11-leerder aan die Martie du Plessis-skool vir leerders met spesiale onderwysbehoeftes in Fichardtpark, was ten tyde van die voorval saam met Daniel Malebatso in die motor. Hy is na bewering meegedeel dat die Suzuki Ertiga wat hy bestuur het, kwansuis gebruik word om dwelms mee te karwei.

“Malebatso beweer dat hy ’n sirene gehoor het voordat die bestuurder van ’n wit Toyota Hilux GD-6 dubbelkajuitbakkie, toegerus met blou ‘polisieligte’, hulle afgetrek het,” sê brig. Athlenda Mathe.

Die verdagtes het toe die twee geskei en Malebatso opdrag gegee om vooruit te ry, terwyl hulle saam met Kamogelo gevolg het – vermoedelik op pad na die Parkweg-polisiekantoor. 

Toe ’n vragmotor egter tussen die twee voertuie verbyry, het die Toyota Hilux verdwyn.

OFM Nuus mvh