Central SA
Inwoners van Clocolan sluit R708-pad, wag op regering se reaksie─── CHARNÉ VAN DER MERWE 11:38 Thu, 10 Jul 2025
Inwoners van Clocolan wag nou vir sleutelamptenare in die Vrystaatse regering om ’n memorandum te kom haal waarin dringende optrede geëis word om die gevaarlike R708-pad te herstel.
Ná herhaalde pleidooie dat die pad herstel moet word, het die Clocolan-boerevereniging, die plaaslike taxivereniging en ander belanghebbendes sake in eie hande geneem en die pad Donderdag (10/7) gesluit.
Andries van Rooyen, voorsitter van die boerevereniging, sê hulle het geen ander keuse gehad as om met die sluiting voort te gaan nie. “Ná talle pogings om met die kantoor van die LUR vir paaie en vervoer, Jabu Mbalula, te kommunikeer, is ons met geen ander keuse gelaat as om op te tree nie.
Die Marquard-Clocolan-pad. Foto verskaf
“Dit het gelei tot vandag se sluiting van die R708 tussen Clocolan en Marquard, ’n pad wat in ’n uiters gevaarlike toestand is.” Hy het bevestig dat die pad gesluit sal bly totdat Mbalula of ’n amptelike verteenwoordiger persoonlik opdaag om die memorandum te ontvang.
OFM Nuus het vroeër berig dat die verenigings se pogings om die probleem op te los herhaaldelik geïgnoreer is. “Ons het ’n formele brief aan Mbalula voorgelê waarin ons noem dat al ons pogings om die departement te betrek óf met stilte begroet is óf met onprofessionaliteit gehanteer is,” sê Van Rooyen.
’n Lugfoto van die verkeersopeenhoping weens die padsluiting. Foto verskaf/Henry Minnaar
Hy sê ’n geskeduleerde vergadering vir Dinsdag (8/7) om dringende veiligheidskwessies te bespreek, is geïgnoreer, en ’n ander poging om die departement Maandag (7/7) te betrek, is botweg deur ’n amptenaar van die hand gewys.
LEES OOK: Herstelwerk begin binnekort aan een van ‘swakste paaie in Vrystaat’
Volgens Van Rooyen het die verenigings dit duidelik gemaak dat hierdie optrede die laaste uitweg is nadat alle ander kommunikasiekanale uitgeput is.
Die sluiting word vreedsaam uitgevoer, met ’n noodbaan wat oopgehou word vir ambulanse, wetstoepassing en voertuie wat kontant vervoer. “Die pad sal gesluit bly totdat die memorandum formeel in ontvangs geneem is en ons werklike betrokkenheid van die LUR se kantoor sien,” het Van Rooyen gesê.
Teen Donderdag het die LUR se kantoor nog steeds nie op die brief gereageer nie.
