Central SA
Kimberliete eis dringende optrede midde-in spanning met munisipaliteit─── ZENANDE MPAME 14:23 Tue, 15 Jul 2025
Die gemeenskap van Kimberley is gereed om betogings voort te sit indien die reaksie van die premier onbevredigend is ná die oorhandiging van ’n memorandum.
Die versoekskrif is Maandag (14/7) aan Zamani Saul, Noord-Kaapse premier, oorhandig deur gemeenskapslede, die Kimberley-aksiegroep (KAG) en ander geallieerde belanghebbendes.
Die memorandum som die gemeenskap se frustrasies en eise op en doen ’n beroep op onmiddellike uitvoering daarvan, asook op aanspreeklikheid en deursigtigheid.
Die Kimberley-stilstand is gemik op toenemende frustrasie oor swak dienslewering, die verwydering van die munisipale bestuurder en direkteure en die ontbinding van die Sol Plaatje-raad.
Dit poog ook om die gebrek aan vordering met die formalisering van informele nedersettings, die billike toegang tot geleenthede vir inwoners en die onmiddellike verwydering van die speaker van die raad, Dipuo Peters, aan te spreek.
“Vandag beweeg die gemeenskap saam met gemeenskapsleiers, na die premier se kantoor om ’n reaksie te kry,” sê Boyce Makodi van die KAG. “As die reaksie onbevredigend is, is die gemeenskap gereed om met die betogings voort te gaan totdat ons gehoor word.
“Die terugvoer van die premier sal bepaal hoe ons verder gaan. Ons het ook ’n pleidooi aan die premier en die provinsiale polisiekommissaris gerig vir die vrylating van die sewe persone wat gearresteer is.”
Die memorandum van verstandhouding wat aan die premier oorhandig is. Foto: Verskaf/Kimberley-aksiegroep
Oor die inhegtenisnemings sê hy: “Ons het al voorheen die polisie gevra om nie die gemeenskap te provoseer of te ontstel deur skokgranate te gooi nie – en dit is presies wat in Greenpoint gebeur het,” sê hy.
“Een gemeenskapslid is glo met ammunisie geskiet terwyl hy werk toe was, en hy is nou in die hospitaal. Selfs die minderjarige en ander wat gearresteer is, het bloot van hul erwe af of in winkels gestaan en die protes dopgehou,” sê Makodi.
Hy beweer die polisie het mense begin sleep en in vangwaens gelaai en weggeneem. “Hierdie optrede van die polisie was onnodig en eensydig.”
Sewe verdagtes, insluitend ’n minderjarige, sal Dinsdag (15/7) in die Kimberley-landdroshof verskyn op aanklagte van beweerde openbare geweld. Hulle is Maandag in hegtenis geneem toe die eenheid vir openbare orde in Greenpoint op die N8 ontplooi is om beweerde geweld aan te spreek.
Polisie in Kimberley hou steeds die situasie in die stad dop, veral omdat die gemeenskap weer sou vergader om na die premier se kantoor op te ruk.
