Anna Fourie (73), Lynette Brummer (64), Mapaseka Majorobella (35), Nomsa Ngcongwane (55), Ntswaki Mofolo (30) en Puseletso Moloi (33) staan tereg op aanklagte van poging tot moord, aanranding met die opset om ernstig te beseer, ontvoering en oortreding van artikel 13 van die Wet op Ouer Persone.

Fourie, Brummer, Majorobella en Ngcongwane is op 9 Julie in hegtenis geneem en het Dinsdag (15/7) hul tweede verskyning vir ’n formele borgtogaansoek gemaak. Mofolo en Moloi is Maandag (14/7) in die aftreeoord in hegtenis geneem ná verdere ondersoeke.

Familie van die bejaarde slagoffer in die Welkomse landdroshof. Foto: Charne van der Merwe

Die staat het die hof egter meegedeel dat hulle nie genoeg tyd gehad het om voldoende bewyse in te samel om borgtog doeltreffend teen te staan nie. Die dossier is eers Maandag (14/7) ontvang met baie inligting wat nog uitstaande is.

Die verdedigingspan het die staat daarvan beskuldig dat hulle vertragingstaktiek gebruik en aangevoer dat uitstellery ’n taktiek is om die beskuldigdes te straf deur hulle in aanhouding te hou, aangesien die staat nie wil hê dat borgtog toegestaan word nie.

Die span het Dinsdag aangevoer dat dit ses dae was sedert die beskuldigdes in hegtenis geneem is, voldoende tyd vir die staat om feite in te samel, sy saak voor te berei en gereed te wees vir die borgtogaansoek, het adv. Hendrik Potgieter gesê.

Kamera in kamer

Die staat het ao. Anja Tait geroep om hul saak teen die borgtogaansoeke te versterk met verwysing na die erns van die beweerde mishandeling.

Tait het getuig dat die slagoffer se dogter ’n sigbare kamera in haar ma se kamer geïnstalleer het. Personeel was daarvan bewus en beeldmateriaal is aan die polisie oorhandig. In die video het Brummer – blykbaar bewus daarvan dat sy opgeneem word – kwaad geword toe die bejaarde weier om haar medikasie te neem.

Sy het haar na bewering uitgeskel, pille in haar mond gedwing, in haar gesig geblaas, haar neus geknyp en op haar gespoeg. Terwyl die slagoffer geskree het, het Brummer met maskeerband teruggekeer en dit om die bejaarde se mond en kop gedraai.

Familie en vriende van die beskuldigdes in die landdroshof in Welkom. Foto: Charne van der Merwe

Tait het gesê Fourie het toe met ’n foon ingekom en Brummer het die oproep geneem terwyl die bejaarde steeds om hulp geroep het. Brummer het volgens haar getuienis toe nóg kleefband om die bejaarde se mond en haar hande gedraai. Twee ander personeellede het toe ingekom, maar niks gedoen nie.

Brummer het toe die vrou met ’n kombers toegemaak, gesê niemand sou haar hoor nie, die ligte afgeskakel en saam met die ander die vertrek verlaat.

Die volgende dag het Tait die fasiliteit besoek.

Geen dokumente op perseel

'n Vrou, slegs bekend as Hester, het indiensnemingsrekords vir alle personeellede behalwe Brummer verskaf. Sy het na bewering gesê dat daar geen dokumente of inligting met betrekking tot Brummer op die perseel is nie.

Volgens Tait het sy Vrydag ’n opvolgbesoek gedoen, maar steeds het geen dokumentasie ontvang.

Die staat is steeds besig om Tait te ondervra. Die ondervraging sal na verwagting voortduur wanneer die saak Woensdag hervat word.

OFM Nuus/Charne van der Merwe mc