Die mans het glo hul werkplek verlaat om onderdele te gaan haal en nooit teruggekeer nie.

Christiaan van Blerk (34) en Donovan van der Walt (25) is Maandag (14/7) laas gesien nadat hulle glo onderdele in Klerksdorp Industria gaan optel het, sê kol. Adéle Myburgh, polisiewoordvoerder.

Donovan van der Walt (25) word vermis. Foto: Noordwes-polisie

Hulle was na bewering in Afrikaner Plot in Wesselstraat, Meiringspark, en het in 'n wit Toyota Hilux Raider-bakkie met registrasienommer KWF254NW gery.

Myburgh sê ten spyte van ’n uitgebreide soektog, is daar geen positiewe resultate gevind nie.

Die voertuig waarmee die vermiste mans gery het. Foto: Noordwes-polisie

Die polisie versoek nou dringend die publiek se hulp om die vermiste mans op te spoor.

Van Blerk (34) is skraal gebou, ongeveer 1.8 m lank, met lang bruin hare en bruin oë. Hy het ’n litteken op sy regterwang, ’n kruis-tatoeëermerk op sy bo-arm en ’n hoefyster-tatoeëermerk op sy bobeen.

Van der Walt (25), ook skraal gebou, is ongeveer 1.6 m lank, met bruin hare, ligblou oë, ’n swart snor en baard (ongeskeer). Hy het verskeie tatoeëermerke, insluitend ’n leeu-tatoeëermerk op sy linkerarm/hand.

Christiaan van Blerk (34) word vermis. Foto: Noordwes-polisie

Enigiemand met inligting oor hul verblyfplek word versoek om ao. Louis Harmse van die Klerksdorp-speurders te kontak by 083 607 1395, of die SAPS Stop Misdaad by 08600 10111 te skakel.

Anonieme wenke kan ook deur die MySAPS-app ingedien word.

Myburgh het die gemeenskap verder aangemoedig om enige afpersingsverwante inligting aan die afpersingslyn by 080 091 1011 aan te meld.

OFM Nuus/Charne van der Merwe cg