Piet Badenhorst is Dinsdag (15/7) in die Zeerust-streekhof tot twee jaar tronkstraf gevonnis op elk van die drie aanklagte van seksuele aanranding waaraan hy skuldig bevind is, sê Sivenathi Gunya, NVG-woordvoerder.

Badenhorst, wat onskuldig gepleit het, is skuldig bevind op twee aanklagte van seksuele aanranding waarby twee slagoffers betrokke was, sowel as ’n bykomende aanklag van ontbloting. Volgens Gunya sal van die vonnisse gelyktydig uitgedien word, wat beteken dat hy ’n effektiewe tronkstraf van vier jaar sal uitdien.

OFM Nuus het voorheen berig Badenhorst is in April skuldig bevind aan die seksuele aanranding van twee tienerseuns. Hy het die slagoffers betas en homself aan hulle ontbloot.

Albei seuns was op skool op Zeerust ten tyde van die voorvalle.

“Daar was oorspronklik drie klaers. Die hof het egter een van die sake teruggetrek,” het kol. Adèle Myburgh, polisiewoordvoerder vroeër gesê.

‘Teenstrydige weergawes van gebeure in die hof gegee’

Badenhorst is vrygespreek op die derde aanklag. Hy was blykbaar betrokke by voertuigherstelwerk ten tyde van sy inhegtenisneming. Volgens Myburgh het hy in 2020 vir die eerste keer in die hof op die aanklagte verskyn.

“’n Tienerseun van Zeerust het in 2020 beweer dat Badenhorst hom tydens ’n sporttoer in Kroonstad verkrag het toe hy 13 jaar oud was. Badenhorst is in 2022 in die Kroonstadse landdroshof onskuldig bevind aan die verkragting van die 13-jarige.

“Dit was nadat die klaer teenstrydige weergawes van gebeure in die hof gegee het,” het Myburgh gesê. Badenhorst het blykbaar sy vrou – wat betrokke was by sportafrigting by die Zeerust-skool – op die toer vergesel.

OFM Nuus mvh