Central SA
Bloemfonteinse prokureur oor twee maande verhoor─── CHARNÉ VAN DER MERWE 10:53 Thu, 31 Jul 2025
Die verhoor van die Bloemfonteinse prokureur, wat van boedelbedrog beskuldig word, begin na verwagting op 30 September.
Elmari Vosloo (47) het Donderdag (31/7) vlugtig in die plaaslike landdroshof verskyn.
Vosloo het die klaer se boedel van ongeveer R6 miljoen in kontant van Januarie 2015 tot Julie 2017 bestuur, sê ao. Fikiswa Matoti, woordvoerder van die Valke.
“Die verdediging is nou gereed om op verhoor te gaan nadat die inhoud van die dossier hersien is,” sê adv. Allen Simpson, haar regsverteenwoordiger.
Elmari Vosloo word verdink van boedelbedrog. Foto: Charné van der Merwe
“Die R6 miljoen, wat uit die verkoop van eiendomme (plase) by Lindley gekom het, is in Vosloo se praktyktrustrekening inbetaal. Sy het toe die geld in aangewese beleggingsrekeninge belê, soos vereis, voordat dit aan die boedel versprei sou word,” het Simpson bygevoeg.
Volgens Simpson hou Vosloo vol dat sy geeneen van die fondse verduister het nie en dring daarop aan dat die geld in die korrekte trust- en beleggingsrekeninge bly.
“Die Raad vir Regspraktisyns het haar praktyk in 2017 oorgeneem en beheer oorgeneem van die trustrekening sowel as die gepaardgaande beleggings.”
Praktiseer sonder geldige getrouheidsfondssertifikaat
Die klaer beweer egter dat die geld in Vosloo se persoonlike bankrekening gedeponeer is, pleks van in die verpligte trustrekening. Hierdie beweerde wanbestuur het na bewering gelei tot ’n finansiële verlies van ongeveer R3,4 miljoen vir die klaer.
’n Dagvaarding is op 11 Junie aan Vosloo beteken.
Verdere ondersoeke het aan die lig gebring dat Vosloo sonder ’n geldige getrouheidsfondssertifikaat gepraktiseer het, ’n wetlike vereiste vir alle prokureurs.
