Omdat die kragrekening vir ’n enkele aandwedstryd R100 000 oorskry, word die unie gedwing om aandwedstryde heeltemal te skrap. Die finansiële druk is net té groot, sê Arni van Rooyen, uitvoerende hoof van die Griekwaland-Wes-rugbyunie.

“Die eerste aanskakeling van die maand kos ’n verstommende R130 000 as gevolg van wat bekend staan as ’n (spitstydheffing), waarna dit ongeveer R68 000 beloop vir elke vier uur wat die ligte gebruik word.”

Toeskouers by Suzuki-stadion in Kimberley. Foto: Facebook

Hy sê dit is eenvoudig te duur. Elke aandwedstryd lei tot ’n groot finansiële verlies vir Griekwaland-Wes.

Dit dwing hulle om wedstryde op ’n Vrydag om 15:00 te laat begin, wat dit vir talle ondersteuners moeilik maak om dit by te woon. “Ons weet ons kan groter skares saans lok en ’n beter algehele ervaring met bykomende aktiwiteite bied, maar die … beligtingskoste maak dit onmoontlik.

“Die meeste mense kan nie die werk verlaat om ’n Vrydagwedstryd om 15:00 by te woon nie. Ons weet ondersteuners sou eerder om 19:00 kom. Ons borge verstaan die situasie, maar natuurlik beïnvloed dit ons kaartjieverkope en inkomste.”

Lae kaartjiepryse

Hy glo vanweë die span se goeie vertoning die laaste paar jaar sal veel meer mense die wedstryde wou bygewoon het as dit saans gespeel kon word.

Die unie hou die kaartjiepryse reeds so laag moontlik om bywoning aan te moedig. Om dit te verhoog is nie ’n opsie nie, aangesien dit nie die enorme elektrisiteitskoste sal bestry nie.

Die unie het probeer om ’n oplossing te vind. Griekwas en die Sol Plaatje-Universiteit, die eienaar van die Suzuki-stadion, het verskeie gesprekke met die Sol Plaatje-munisipaliteit gevoer in ’n poging om goedkoper tariewe te verseker, maar hierdie gesprekke was tot dusver onsuksesvol.

Weg vorentoe

“Ander rugbyunies word deur hul munisipaliteit ondersteun, omdat die impak van tuiswedstryde plaaslike besighede bevoordeel en sporttoerisme bevorder. Ons glo sterk as ons ’n vennootskap met die munisipaliteit kan skep, sal dit ’n wen-wen-situasie vir die stad en die unie wees,” meen Van Rooyen.

Volgens Pieter Bergh, Griekwas se afrigter, word die moontlikheid tans deur die unie ondersoek om met die munisipaliteit of met die universiteit saam te werk om ’n weg vorentoe te vind – en miskien selfs na ’n gedeelde befondsingsmodel te kyk om die beligting beter te benut.

“Ons het van die beste fasiliteite in Suid-Afrika. Dit sal wonderlik wees om die gebruik daarvan te maksimeer. 

‘Unie se finansiële volhoubaarheid kan in gedrang kom’

“Bygesê, hierdie soort strategiese besluit lê werklik by die uitvoerende hoof en die leierskapspan. My fokus is op wat op die veld gebeur – nie op my salaristjek nie!”

Gevra oor alternatiewe terreine, wys Van Rooyen daarop dat ander velde in Kimberley nie aan die professionele vereistes voldoen nie en dat dit ook die verhouding met borge en uitsaaiers soos SuperSport sal beïnvloed.

Die unie se finansiële volhoubaarheid kan op lange duur in gedrang kom. “Dit is ’n korttermyn- en langtermynkwessie. Om minder kaartjies te verkoop beteken verminderde inkomste, en dit beïnvloed hoe ons vir die toekoms beplan.”

‘Ons het omtrent vyf jaar gelede laas ’n aandwedstryd aangebied’

Tog is daar ’n mate van hoop. Die installering van LED-spreiligte word oorweeg as deel van die unie se infrastruktuurontwikkelingsplan. 

Dit sal energiekoste drasties verminder en moontlik aandwedstryde weer lewensvatbaar maak. Van Rooyen sê ten spyte van die struikelblok wat spreiligte betref is hy dankbaar vir die ondersteuners se lojaliteit. 

“Ons het omtrent vyf jaar gelede laas ’n aandwedstryd aangebied. Ons ondersteuners is ongelooflik, en ons wil hulle die beste moontlike ervaring gee.

“Baie van hulle reis van buite Kimberley en moet oorslaap wanneer hulle wedstryde wil bywoon. Ons wil dit vir almal moontlik maak om rugby te kyk op ’n tyd wat hulle pas.”

OFM Nuus/Charne van der Merwe cvs/mvh