Die jaarlikse munt-en-banknootbeurs, aangebied deur Bloemfontein Numismatics, vind in die Windmill-konferensiesentrum plaas. Die beurs het een van die hoogtepunte op die numismatiese kalender geword en lok ervare versamelaars sowel nuuskierige nuwelinge wat graag die fassinerende wêreld van skaars muntstukke en note wil verken, sê Juan Terblanche, organiseerder en eienaar van Bloemfontein Numismatics.

“Besoekers sal die geleentheid hê om hul versamelings te evalueer, te verkoop of uit te brei, met verskeie nasionale handelaars en kundiges wat beskikbaar is om gratis waardasies te gee.”

Onder die bekende deelnemers is P&G Coin, Basanis Auction House, DuPreez Numismatics, Gold Reef City Mint, JWH Coins, Randcoin, Buffalo Coin, Rare Commodities Collectors Investments, Bucks & Gems, InvestGold, Scoinshop en vele ander.

Terblanche sê handelaars kan selfs direkte aanbiedinge maak wat versamelaars die kans gee om met kontant in die hand weg te stap.

Vir diegene wat op soek is na seldsame vondste, is die beurs die perfekte geleentheid. Deelnemers kan ’n groot verskeidenheid opsies verwag, van byna onbekombare munte tot bekostigbare winskopies; behalwe miskien legendariese rariteite.

Tog, soos die versamelaars sê, weet ’n mens nooit wat op so ’n geleentheid kan opduik nie.

Silwer gedenkmunte te koop

Volgens Terblanche sal Gold Reef City Mint ook ’n unieke element tot die dag toevoeg. Hulle sal silwer gedenkmunte verkoop en hul handmuntpers ten toon stel, wat versamelaars in staat stel om munte met ’n spesiale Bloemfontein-muntmerk te oorstempel. 

“Hierdie beperkte stukke kry dikwels mettertyd waarde, wat dit ’n gesogte toevoeging vir ernstige versamelaars maak.”

Toegang is gratis en die deure open om 10:00. Vir nog inligting, maak kontak met Juan Terblanche by 082 960 5170.

OFM Nuus/Charne van der Merwe cvs