Central SA
Potchefstroom-hondeaanval: Saak uitgestel tot Oktober─── ZENANDE MPAME 14:49 Tue, 26 Aug 2025
Die saak van die Potchefstroom-egpaar wie se drie Amerikaanse veghonde hul huiswerker aangeval het, sal op Vrydag 3 Oktober weer in die Potchefstroomse streekhof verskyn, hangende ’n besluit van die direkteur van openbare vervolgings (DOV).
Die landdros het beslis dat Marno en Chandré Mostert van die hofverrigtinge vrygestel word en dat slegs hul regsverteenwoordigers teenwoordig hoef te wees. Die saak is voorheen uitgestel weens hangende uitkomste van voorleggings wat deur die egpaar se regsverteenwoordigers aan die DOV gestuur is.
“Ten minste is ons kliënte dié keer van die hofverrigtinge vrygestel, so hulle hoef nie elke keer te verskyn nie,” sê Malan Schutte, die egpaar se prokureur. “Ons sal verskyn en hulle net in kennis stel.”
Dipuo Kokolosi is glo in Januarie 2022 deur drie van die paartjie se honde aangeval. Foto: Wouter Pienaar
Dit het baie geld gekos aangesien hulle al sowat 30 keer hof toe moes gaan en elke keer van Klerksdorp af moes reis. Die saak is uitgestel na Vrydag, 3 Oktober.
Dipuo Kokolosi is glo in Januarie 2022 deur drie van die paartjie se honde aangeval. Sy is in Januarie verlede jaar geopereer om haar neus kosmeties te herstel.
Dele van haar dye, neus, lip, ore, bene en hande is deur die honde afgeskeur. Die saak is om verskeie redes vertraag, insluitend ’n bykomende klag teen die egpaar nadat dit bekend geword het dat die honde Kokolosi voorheen gebyt het.
’n Ouer foto van die Mosterts se Amerikaanse veghonde. Foto: Facebook
Die egpaar het in Augustus verlede jaar versoek dat die saak teen hulle laat vaar word omdat hulle gevoel het die vertragings benadeel hulle en dat ’n skuldigbevinding min kans op sukses het.
Kokolosi is glo aangeval terwyl sy alleen in die huis was en skottelgoed gewas het.
Een van die bure het haar gille gehoor en ondersoek ingestel. By sy aankoms het hy die drie honde op haar gesien en ’n waarskuwingskoot afgevuur.
Intussen sal ’n inwoner van Bloemfontein op Dinsdag 2 September gevonnis word op ’n klag van strafbare manslag nadat haar Amerikaanse veghond uit haar erf ontsnap en ’n kind doodgebyt het.
Keabetswe Moroane (43) is in Julie in die Bloemfonteinse streekhof skuldig bevind nadat die hond Olebogeng Mosime op 12 November 2022 in sy erf in Vistapark aangeval en doodgebyt het.
