Alet de Ridder, ma van Chris van der Wal (31), sê sy wil net antwoorde hê oor haar kind se laaste oomblikke. “Ek weet hy is met ’n mes doodgesteek, maar dis al wat ons weet. Ek wil net verstaan wat gebeur het en hoekom,” sê sy.

Van der Wal se liggaam is op 28 Augustus op die hoek van Nelson Mandela-laan (N12) en Sol Plaatjie-straat in Potchefstroom gevind.

'n Kaart wat wys waar Chris beweeg het. Foto: Potchefstroom First Responders

De Ridder sê haar seun sou nooit op sy eie na daardie deel van die dorp, wat as die middestad bekend staan, gegaan het nie, omdat hy goed bewus was van die gevare. 

“Met sy volle bewussyn sou Chris nooit daarheen gegaan het nie. Daarom is hierdie hele situasie so verwarrend vir ons,” sê sy.

Lt.kol. Sam Tselanyane, provinsiale polisiewoordvoerder, het bevestig dat die polisie in Potchefstroom die publiek vra om te help met enige inligting wat kan lig werp op Van der Wal se laaste bewegings.

Ooggetuies en laaste bewegings

“Ons doen veral ’n beroep op inwoners in die huisdokters- en middestadgebiede – Du Plooystraat, Govan Mbeki en omliggende strate – om tussen 01:00 en 04:30 daardie oggend vorentoe te kom,” sê Tselanyane. “Alle inligting sal vertroulik hanteer word.”

Volgens ooggetuies was Van der Wal vroeër daardie aand betrokke by ’n woordewisseling in die parkeerarea van GP, sê Potchefstroom First Responders.

Hy het glo ’n vriend gehelp om in sy motor te klim en het omstreeks 01:00 saam met hom weggery – na bewering met Van der Wal agter die stuur. 

Chris van der Wal is vroeg Sondagoggend dood in Potchefstroom aangetref. Foto verskaf

Die vriend het later aan die polisie gesê hulle het in Govan Mbeki-straat gery en naby die verkeerslig by die gholfbaan gestop, waar hulle ’n meningsverskil gehad het. Van der Wal het toe uit die motor geklim in die omgewing van Du Plooystraat en Govan Mbeki.

Omstreeks 04:30 daardie oggend het die polisie die familie in kennis gestel dat hy oorlede is. Johan Barnard, Van der Wal se swaer, sê CCTV-beeldmateriaal wys glo hoe Chris oor die N12 in Potchefstroom se middestad hardloop terwyl hy sy nek vashou, voordat hy buite ’n restaurant ineenstort. 

Dit is onbekend hoe lank hy daar gelê het voordat sekuriteitswagte hom opgemerk en hulp ontbied het. Sy beursie en ID is steeds in sy sak gevind toe Barnard hom moes gaan identifiseer.

Stil, vriendelike mens

Van der Wal se familie beskryf hom as spontaan, vriendelik en altyd bereid om te help. Hy was ’n rustige mens en ’n kitaarspeler wat daarvan gehou het om tyd saam met familie deur te bring.

Hy was ’n oudleerder van Hoërskool Ferdinand Postma en het sewe jaar as gastegnikus by Gas World gewerk.

Van der Wal se afskeidsdiens vind op 17 Oktober om 10:30 in die AGS-kerk Miederpark, Potchefstroom, plaas.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe mvh