Marius de Villiers (62), Petrus Johannes Combrink (60), Petrus Jacobus Oosthuizen (60), Gert Abraham Coetzee (34) en Jan Homes Viljoen (45) word saam met Jagersfontein Developments en verskeie maatskappye aangekla. Hulle staan tereg op altesaam 13 aanklagte, waaronder moord, omgewingsbesoedeling en oortredings van damveiligheidsregulasies.

Die saak is voorheen uitgestel om die verdediging toegang tot die dossier te gee en genoeg tyd te gee om die inhoud daarvan te hersien. Die aanklagte sluit in drie van moord, ingevolge Artikel 51(1) van die Strafregwysigingswet, wet 105 van 1997.

Die toneel van die slikramp in September 2022. Foto verskaf

Die ander aanklagte hou verband met:

• beduidende omgewingsbesoedeling;
• versuim om aan watergebruiklisensievoorwaardes te voldoen;
• die verskaffing van valse of onvolledige inligting;
• die belemmering van amptenare van die departement van water en sanitasie (DWS) om hul pligte uit te voer;
• die versuim om DWS-riglyne na te kom;
• die versuim om ’n dam met veiligheidsrisiko’s te registreer;
• ongemagtigde veranderinge aan ’n dam met veiligheidsrisiko’s;
• die versuim om ’n professionele span vir damontwerp aan te stel;
• die versuim om aan kategorie III-dammonitering en -verslagdoening te voldoen;
• die versuim om aan kategorie III-damveiligheidsvereistes te voldoen;
• die oortreding van Artikel 9 van die Wet op Beroepsgesondheid en -veiligheid, Wet 85 van 1993; en
• kwaadwillige saakbeskadiging (121 aanklagte).

Gemeenskapslede in die hof. Foto: Charne van der Merwe

Volgens die pleitooreenkoms word die beskuldigdes daarvan aangekla dat hulle die dood van Kozkor Shadrach Williams, Ralehana Aaron Moseu en Msokoti Petrus Khuthu op 11 September 2022 veroorsaak het. Khuthu se liggaam is nooit gevind nie.

Die aanklagte spruit uit die ineenstorting van die wal van die slikdam, wat na bewering veroorsaak is deur die oorskryding van watergebruikslisensieperke, die ignorering van DWS-riglyne en die indiening van stabiliteitsverslae wat benede peil was.

Die ramp het die Charlesville- en Itumeleng-nedersetting verwoes en ongeveer 186 inwoners dakloos gelaat. ’n Boer van die plaas Vlakfontein het 90% van sy skape verloor, volgens die Bench-Marks-stigting.

‘Lank gelede gewaarsku oor die risiko’s, maar daardie waarskuwings is geïgnoreer’

“Die Jagersfontein-slikdamramp het geweldige skade aan eiendom veroorsaak en tot die verlies van lewens gelei,” het dr. Roy Jankielsohn, Vrystaatse DA-leier, voorheen gesê. 

“Ons verwelkom die dagvaardings wat uitgereik is aan diegene wat nou aanspreeklik gehou moet word vir hierdie verwoestende gebeurtenis.

“Mense is lank gelede gewaarsku oor die risiko’s, maar daardie waarskuwings is geïgnoreer.”

Massas slik het in September 2022 deur Jagersfontein gespoel. Foto verskaf

Die vervolging volg op ’n deeglike ondersoek deur die Valke en die departement van bosbou, visserye en die omgewing, waarna die NVG besluit het om te vervolg.

Adv. Johan Roothman lei die vervolging, terwyl adv. Barry Roux De Villiers, Combrink en Jagersfontein Developments verteenwoordig.

Adv. Adriaan Janse van Rensburg tree op vir Oosthuizen, Coetzee en MVD Kalahari Consulting Engineers and Town Planners, en adv. Allen Simpson verteenwoordig Viljoen. Adv. Mannie Witz verskyn vir SRK Consulting (Suid-Afrika).

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus/Charne van der Merwe mvh