Na wat soos ’n nimmereindigende wag gevoel het, toon herstelwerk van die R76 tussen Steynsrus en Kroonstad uiteindelik werklike vordering. Dit is ’n groot verligting vir gefrustreerde inwoners en boere.

Die VF Plus sê die lank uitgestelde projek kry “uiteindelik momentum” na maande van volgehoue druk en voortdurende toesig van die party.

“Ons monitor hierdie projek al jare lank noukeurig en dit is bemoedigend om uiteindelik sigbare verbetering op hierdie noodsaaklike 48 km lange stuk pad te sien,” sê Armand Cloete, VF Plus-leier in die Vrystaat.

“Inwoners het lank genoeg gely as gevolg van die regering se wanbestuur.”

Die herstelprojek wat in 2019 begin het, was veronderstel om teen 2022 voltooi te wees. In plaas daarvan het dit vir byna twee jaar tot stilstand gekom nadat die Vrystaatse departement van gemeenskapsveiligheid, paaie en vervoer erken het meer as R270 miljoen is vermors.

Cloete sê die VF Plus het in 2023 die spesiale ondersoekeenheid (SOE) versoek om die kontrakte en besteding te ondersoek wat met die projek verband hou. 

“Tydens verskeie toesigbesoeke deur beide die party en die provinsiale wetgewer se portefeuljekomitee is bevestig die oorspronklike kontrakteur, Sedtrade, het die werk onvoltooid gelaat. Binne maande het die padoppervlak begin agteruitgaan en in 'n groot veiligheidsgevaar verander wat talle ongelukke veroorsaak het.”

Phezulu Construction

Ná 'n vergadering wat deur MaQueen Letsoha-Mathae, premier, in Steynsrus in Oktober 2024 byeengeroep is, is die tender aan Phezulu Construction hertoegeken. Die maatskappy het in Mei vanjaar begin werk en vordering is reeds sigbaar.

“Dit is onaanvaarbaar dat korrupsie en swak bestuur infrastruktuurprojekte in ons provinsie steeds verlam,” sê Cloete. “Die premier bly belowe om teen ondoeltreffende kontrakteurs op te tree, maar die gebrek aan verantwoordbaarheid spreek vanself.”

Geld vermors

Die VF Plus sê hulle hou die ontwikkelinge fyn dop en sal eis dat die premier uiteensit hoe sy van voorneme is om die miljoene rande wat reeds op die mislukte projek vermors is, te verhaal.

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus/Charne van der Merwe dg