Die virus versprei deur kontak met respiratoriese afskeidings, speeksel of ontlasting van ’n besmette persoon. Dit is veral algemeen in dagsorgsentrums en kleuterskole.

OFM Nuus is bewus van twee Bloemfonteinse skole wat voorvalle van hierdie siekte aangemeld het.

HVMS is ’n algemene virusinfeksie wat hoofsaaklik jong kinders affekteer. Volwassenes kan dit ook opdoen gewoonlik sonder om simptome te toon. Dit is hoogs aansteeklik en kan vinnig versprei.

Die virussiekte versprei baie vinnig. Foto: Cleveland Clinic

Volgens die Better Health Channel word HVMS veroorsaak deur infeksie met die Coxsackie-virus, ’n soort RNS-virus, wat tot die picornaviridae-familie en die enterovirus-genus behoort.

Die siekte kan ook versprei deur kontak met besmette oppervlaktes of druppels in die lug wanneer ’n besmette persoon hoes of nies. Die vloeistof in die blase dra ook die virus.

Die inkubasietydperk vir HVMS (die tyd tussen infeksie en die aanvang van simptome) is gewoonlik tussen drie en vyf dae, volgens Kids Health.

Simptome 

• koors;
•  seer keel;
• moegheid en lusteloosheid;
•  pynlike blase in die mond, op die agterkant van die keel en op die tong;
•  swak eetlus as gevolg van mondblase; en
•  uitslag aan die handpalms, voete, sitvlak en soms op ander dele vandie liggaam.

Mediclinic Bloemfontein sê dis belangrik om daarop te let dat 90% van HVMS-gevalle asimptomaties is wat beteken dat hulle nie ernstige simptome toon nie.

Die Cleveland Clinic stel voor kinders met HVMS moet minstens sewe dae isoleer of tot hul blase opgedroog het om die verspreiding van die virus te voorkom.

Voorkomende maatreëls 

• Was hande gereeld met seep en water.
•  Maak oppervlaktes vir 60 sekondes skoon met ’n alkohol-gebaseerde ontsmettingsmiddel wat minstens 60% etanol bevat.
•  Vermy die gebruik van standaard nat doekies om die virus uit te skakel.
• Gebruik waterlose ontsmettingsmiddels en doekies slegs as ’n laaste uitweg.

Kinders moet minstens sewe dae isoleer. Foto: Cleveland Clinic

Komplikasies 

• In die meeste gevalle lei HVMS tot ligte simptome en geen langtermyngevolge nie, berig Healthline.
• In seldsame gevalle kan dit egter lei tot ernstige komplikasies soos enkefalitis, meningitis of perikarditis (inflammasie van die perikardium).

Behandeling 

Hoewel daar geen spesifieke behandeling vir HVMS is nie kan die volgende help om ongemak te verlig:

• Gebruik asetaminofeen (nie aspirien nie) soos aangedui vir koors- en pynverligting.
•  Drink baie vloeistowwe, maar vermy suur drankies soos lemoensap wat mondswere kan irriteer.
•  Laat blase natuurlik droog word (moenie dit bars nie, aangesien die vloeistof aansteeklik is).
•  Eet sagte, strelende kosse soos jogurt, roomys en sop.
•  Wend antibakteriese salf aan as ’n blasie bars om ontsteking te voorkom.

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus/Charne van der Merwe dg