Onder leiding van adj.pres. Paul Mashatile is die doel om ekonomiese groei in die platteland aan te wakker en landwyd nuwe werkgeleenthede te skep. Hierdie fokus sluit direk aan by die regering se breër doelwitte om groei en stabiliteit in voorheen benadeelde gebiede te versterk.

Die staat wil ondersteuning bied en infrastruktuur versterk sodat gemeenskappe ekonomies lewensvatbaar kan word. “Die regering prioritiseer ondersteuning aan gemeenskaplike eiendomsverenigings en ander projekte ter ondersteuning van die landbou, om landelike ekonomiese ontwikkeling en werkskepping te stimuleer,” het Mashatile tydens vraetyd in die Nasionale Raad van Provinsies gesê.

Adj.pres. Paul Mashatile antwoord NCOP-vrae. Foto: Paul Mashatile

Mashatile het die noodsaaklikheid van stewiger ondersteuningstrukture en die beskerming van infrastruktuur beklemtoon, wat ’n bepalende rol in die sukses van hierdie projekte speel.

Fokus op Vrystaat

Mashatile se span is veral ingestel daarop om uitdagings soos die vandalisering van waterinfrastruktuur die hoof te bied. 

“Ek was self in die Vrystaat, in plekke soos Mangaung. Ons gaan probeer om baie op die Vrystaat te fokus as gevolg van die uitdagings wat daar ontstaan. Ons is bewus daarvan,” het hy gesê.

Volgens hom sal die beskerming van hierdie kritieke bates verseker dat gemeenskappe wat reeds onder waterskaarste gebuk gaan, ’n meer betroubare toevoer het vir huishoudelike gebruik en landboubedrywighede.

Adj.pres. Paul Mashatile hoop om ekonomiese ontwikkeling op die platteland aan te wakker en landwyd werkgeleenthede te skep. Foto: Paul Mashatile

“Waar waterinfrastruktuur beskerm word, neem hierdie gevalle van vandalisme af, en gevolglik hoef munisipaliteite nie voort te gaan om waterwaens te gebruik nie,” het Mashatile bygevoeg.

Watersekuriteit vir Sentraal-Suid-Afrika

Mashatile beskryf die voortgesette water- en sanitasie-infrastruktuurprojekte, veral Fase 2 van die Lesotho-Hoogland-waterprojek, as lewensbelangrik vir Suid-Afrika se watersekuriteit, met besondere voordeel vir die Vrystaat, Noordwes en die Noord-Kaap.

Hy sê behoorlike maatreëls is reeds in plek in die Noord-Kaap om landbou-ondersteuning te versterk.
“Dit is iets waarmee ons besig is, en sodra ons sake het wat ons kan aanhaal, sal ons daardie inligting voorsien,” het Mashatile gesê.

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM News/Refilwe Bekane mvh