Hierdie byeenkomste word jaarliks verbind met minderjariges wat te veel drink, geweld en onveilige omgewings. Dit is al ’n instelling vir matrieks om na plekke soos Plett Rage, Ballito Rage en ander partytjies te gaan ná die eksamen. 

Siviwe Gwarube, minister van basiese onderwys, doen ’n beroep op matrikulante om nie matriekpartytjies by te woon wat nie veilig is nie. Sy sê die einde van die Nasionale Senior Sertifikaat-eksamen is ’n belangrik mylpaal, maar vieringe mag tot ongelukke of tragedies lei.

Sy verwys na die Enyobeni Taverne-insident in 2022 waar 21 jongmense gesterf het tydens ’n matriekpartytjie. .

Monitor partytjies

Gwarube sê ouers moet weet waar hul kinders is en toesien dat daar volwasse toesig is. “Skole en skoolveiligheidskomitees word versoek om gerugte oor partytjies te monitor en dit te rapporteer waar nodig.”

Die departement sê hulle sal saam met die polisie, munisipaliteite en gemeenskapstrukture toesig verskerp. Onwettige byeenkomste en minder­jariges wat drink sal vinnig gestop word.

Die Vrystaatse drankhandelaarsvereniging ondersteun die waarskuwing en het ’n dringende beroep op alle gelisensieerde plekke in die Vrystaat gedoen om nie sulke partytjies aan te bied, te bevorder of te reël nie.

Veiligheid

Khulu Radebe, president van die vereniging, sê die veiligheid van jongmense moet altyd eerste kom.

In die Oos-Kaap het Xolile Nqatha, LUR vir vervoer en gemeenskapsveiligheid, ook ’n beroep op matrieks gedoen om nie aan gevaarlike vieringe deel te neem nie. “Die partytjies stel matrieks soms bloot aan geweld, uitbuiting en ander risiko’s.”

Matrikulante moet dit verantwoordelik vier en hul veiligheid eerste stel terwyl hulle wag vir hul eksamenuitslae in Januarie.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe dg