Hierdie boorgate wat bedoel is om watervoorsiening te verbeter is in Desember 2024 voltooi en aan die Nketoana-munisipaliteit oorhandig. Die DA kritiseer die munisipaliteit wat onder meer Reitz, Lindley en Petrus Steyn bedien se hantering van die projek. 

Die party doen ’n beroep op verantwoording, herstelwerk en behoorlike veiligheid vir die boorgate.

Die kontrakteur het gewaarsku hulle sal ná die oorhandiging nie meer sekurtiteit verskaf nie, sê Diphapang Mofokeng DA-raadslid. “Dit het gelei tot wydverspreide vandalisme en diefstal by al elf boorgate met transformators, kabels, pompe en skakelaars wat beskadig of gesteel is.”

Grootskaalse vandalisme het plaasgevind. Foto: DA

Hy sê die boorgate was bedoel om die gemeenskap se watervoorsiening te verbeter, maar meer as R12 miljoen is reeds vermors weens nalatigheid deur die amptenare wat verantwoordelik is vir die projek.

Die DA sal die voorsitter van die tegniese dienstekomitee versoek om ’n volledige, gedetailleerde verslag van die direkteur te kry. ’n Dringende komiteevergadering sal belê word om die situasie te bespreek. 

Van die toerusting is erg beskadig. Foto: DA

Mofokeng waarsku watertekorte in Mamafubedu plaas reeds ernstige druk op inwoners. “Sekere dele van Mamafubedu soos die Modise-omgewing kry nie water nie, terwyl die res van die gemeenskap en Petrus Steyn ook onder konstante wateronderbrekings ly. 

“Hierdie situasie kan nie onbeperk voortduur nie. Toegang tot skoon drinkwater is ’n fundamentele mensereg wat deur die Grondwet gewaarborg word.””

• Het jy ’n nuuswenk om te deel? Bel of WhatsApp die OFM Nuuslyn: 066 487 1427.

OFM Nuus dg