Die speurder (58) is Vrydag (28/11) deur die Valke in hegtenis geneem. Hy is verbonde aan die eenheid vir veediefstal en bedreigde spesies op Fouriesburg.

“Dit is sy tweede inhegtenisneming hierdie maand nadat ’n ongelisensieerde vuurwapen vroeër by sy woning gevind is. Hy het toe in die hof verskyn en is op borgtog vrygelaat,” sê ao. Fikiswa Matoti, polisiewoordvoerder.

Genl. maj. Mokgadi Bokaba, provinsiale hoof van die Valke, sê die eenheid bly daartoe verbind om misdaad binne wetstoepassing uit te roei en diegene wat hul mag misbruik aanspreeklik te hou.

Veediefstal bly ’n groot ekonomiese las op boere in die Vrystaat omdat net 9% van die sake wat wel in die hof voorkom tot ’n skuldigbevinding ly.

Roy Jankielsohn. Foto: OFM

Onlangs in die Vrystaatse wetgewer is bekend gemaak van 2023 tot 2025 is sowat 6 390 veediefstalsake by die polisie aangemeld. Hiervan is 1 768 sake vervolg, maar slegs 587 het tot skuldigbevindings gelei. Dit is ’n gemiddelde vervolgingskoers van 27,7% en ’n skuldigbevindingskoers van slegs 9%. 

Volgens Vrystaat Landbou beloop die direkte koste van veediefstal ongeveer R1 miljard per jaar.

Dr. Roy Jankielsohn, DA-woordvoerder oor gemeenskapsveiligheid in die Vrystaatse wetgewer, sê die situasie beklemtoon die dringende behoefte aan ’n meer effektiewe, landwye landelike veiligheidstrategie.

“Intelligensiegedrewe misdaadvoorkoming, verbeterde tegnologie en gespesialiseerde reaksiespanne is dringend nodig.”

Veediefstal neem toe in die feestyd. Foto: Pexel

Hy beklemtoon die landbousektor is ’n nasionale bate en verdien beter beskerming en ondersteuning van die regering. Proaktiewe stappe moet gedoen word om te verseker alle belanghebbendes werk op ’n geïntegreerde wyse saam om misdaad te bekamp. DA-wetgewerlede het ’n private wetsontwerp ter tafel gelê om die stryd teen misdaad in die provinsie op te skerp.

Wetsontwerp stel voor:

• beter en formele samewerking tussen plaaslike gemeenskappe en die polisie;
• die formele akkreditasie van gemeenskapsorganisasies betrokke by misdaadvoorkoming;
• die vestiging van ’n geïntegreerde inligtingstelsel in die Vrystaat wat nie uitsluitlik op misdaadstatistieke staatmaak nie;
• beter toesig deur die provinsiale regering oor die polisie; en
• die skep van ’n Vrystaatse ombudsman om swak dienslewering deur die polisie te ondersoek.

Het jy ’n nuuswenk om te deel? Bel of WhatsApp die OFM Nuuslyn: 066 487 1427.

OFM Nuus/Charne van der Merwe dg