Die AfriForum-takke in Bloemfontein doen ’n beroep op inwoners om die petisie teen die Mangaung-metro se plan te onderteken. Dit sal help om te keer dat belangrike en histories betekenisvolle munisipale eiendomme verkoop word.

Christo Groenewald, distrikkoördineerder van AfriForum in Bloemfontein, sê die metro se besluit om hierdie eiendomme te vervreem is nie net onverskillig nie, maar ook strydig met die wet en die beginsels van verantwoordelike openbare bestuur.

Politieke elite

“Hierdie eiendomme behoort aan die gemeenskap en nie aan die politieke elite wat dit agter geslote deure wil verhandel nie. Ons kan eenvoudig nie toelaat strategiese en historiese grond soos die Tempe-lughawe en Naval Hill word vervreem sonder behoorlike openbare deelname en deursigtigheid nie.” 

AfriForum beklemtoon hoewel die munisipaliteit slegs 14 projekte of “eiendomme” in sy openbare kennisgewing gelys het, dek hierdie projekte in werklikheid 153 individuele erwe oor verskeie stadsdistrikte en landelike gebiede. 

Hierdie grootskaalse vervreemding hou verreikende gevolge in vir stedelike beplanning, omgewingsbewaring en openbare toegang tot strategiese grond.

Die eiendomme behoort aan die gemeenskap. Foto: bloemfonteintourism 

Die petisie is begin nadat AfriForum op 23 Oktober ’n formele beswaar by die metro ingedien het waarin versoek is die proses moet gestaak word totdat behoorlike openbare konsultasie plaasgevind het. 

Geen reaksie is ontvang nie en die organisasie het sy regsverteenwoordigers by Hurter Spies Inc. opdrag gegee om verdere stappe te oorweeg indien die metro nie sy wetlike verpligtinge ingevolge die Wet op Munisipale Finansiële Bestuur en die Wet op die Bevordering van Administratiewe Geregtigheid nakom nie.

 Hurter Spies Inc. het ook op 10 November ’n brief aan die metro gestuur en gevra vir ’n antwoord binne 14 dae. Dit is ook geïgnoreer.

Inwoners word gevra om die petisie te onderteken. Foto: bloemfonteintourism 

Die AfriForum se petisie vorm deel van die organisasie se voortgesette pogings om openbare deelname te herstel en te beskerm. Inwoners van Bloemfontein, Heidedal, Botshabelo en Thaba ’Nchu word aangemoedig om hul stemme te laat hoor deur die petisie te onderteken.

“Gemeenskappe in die Mangaung-metro moet self sê ‘genoeg is genoeg’. Hierdie grond is deel van ons erfenis en gemeenskaplike belang. Ons sal nie toekyk terwyl dit vir korttermynwins vermors word nie,” sê Groenewald.

• Het jy ’n nuuswenk om te deel? Bel of WhatsApp die OFM Nuuslyn: 066 487 1427.

OFM Nuus dg