Volgens die provinsiale polisiewoordvoerder, lt.kol. Thabo Litabe, het sers. Lillian Moroka die kinders vroeër vanjaar opgemerk tydens haar daaglikse reis tussen die werk en huis. Hulle omstandighede het haar diep geraak. 

Aangemoedig deur hul behoefte, het sy besluit om geld opsy te sit om hulle te help. Sy het oorspronklik beplan om die skenkings voor Kersfees te oorhandig, maar het die plan uitgestel nadat sy verneem het die kinders gaan die vakansie saam met hul ouma deurbring.

Sers. Lillian Moroka en ’n kollega deel skenkings uit. Foto: SAPD/Facebook 

Die geskenke is toe op Oujaarsdag uitgedeel nadat Moroka weer met hul ouers kontak gemaak het. Van haar kollegas het haar vergesel terwyl sy die geskenke aan die kinders oorhandig het. 

Die kinders was sigbaar opgewonde en dankbaar.

“Sers. Moroka het haar dank uitgespreek teenoor kollegas vir hul ondersteuning en bydraes tot die inisiatief. Sy het spesifieke waardering uitgespreek teenoor mevrou Lisa Graaff, wat ook ’n finansiële bydrae gelewer het om die projek suksesvol te maak,” sê Litabe.

Polisie se menslike kant

Die provinsiale kommissaris van die Noord-Kaap, lt.genl. Koliswa Otola, het die betrokkenes geprys vir hul onselfsugtige optrede.

“Dit weerspieël die sorgsame en menslike kant van die Suid-Afrikaanse Polisiediens en versterk die verhouding tussen die polisie en die gemeenskappe wat hulle dien,” het sy gesê.

• Het jy ’n nuuswenk om te deel? Skakel of whatsapp die OFM Nuus-lyn: 066 487 1427.

OFM Nuus mvh