Enzo Breytenbach word deur sy familie as ’n wonderwerk beskou. Enersyds het hy langer as die meeste babas met sy toestand oorleef, en andersyds het dokters vir sy ma, Geraldine van Zyl van Welkom, gesê sy sou nooit ’n baba kon hê nie.

Ses weke ná sy geboorte het niks verkeerd gelyk nie. Enzo is op 4 Desember as ’n gesonde baba gebore, maar op 16 Januarie het Geraldine en haar verloofde, David Breytenbach, se lewe tot stilstand gekom.

Die baba vir wie hulle so lank gebid het, is na die pediatriese intensiewesorgeenheid in Welkom gehaas nadat dokters gesien het hy word blou tydens sy ses-weke-ondersoek.

David Breytenbach en klein Enzo, wat binnekort ’n lewensgevaarlike operasie moet ondergaan. Foto verskaf

Enzo is enkele dae later gediagnoseer met ’n ernstige hartsiekte – ’n seldsame en komplekse kombinasie bekend as transposisie van die groot arteries met ventrikulêre septale defek en dubbele regterventrikel-uitlaat. 

Min babas met hierdie toestand leef glo lank genoeg dat die diagnose gedoen kan word. Verskeie skanderings en sonars het die diagnose bevestig.

Dit beteken die twee hoofslagare wat bloed in en uit die hart moet dra, is omgeruil en albei is aan die verkeerde kant van die hart gekoppel. ’n Gat tussen die hart se kamers is tans die enigste rede waarom Enzo nog leef. Dit stel suurstofryke bloed in staat om deur sy klein lyfie te sirkuleer.

Gat in sy hart

“Die meeste babas met hierdie toestand leef nie eers ’n maand nie,” vertel Geraldine. “As dit nie vir die gat in sy hart was nie, sou Enzo glad nie oorleef het nie. Daardie gat is al wat ons baba nou aan die lewe hou.”

Enzo is oorgeplaas na die Universitas-hospitaal in Bloemfontein nadat sy ouers, wat nie ’n mediese fonds het nie, dringende spesialissorg moes bekom.

David vertel dokters het hul meegedeel Enzo het dringend ’n uiters ingewikkelde opehartoperasie nodig – een van die gevaarlikste prosedures wat op babas uitgevoer word. Slegs ’n handjie vol spesialiste in die land is in staat om dit uit te voer.

Baba Enzo was vir ses weke gesond voordat hy gediagnoseer is. Foto verskaf

“Hulle het ons daarop voorberei hy sal dalk nie die operasie oorleef nie,” sê Geraldine. “Maar ons weier om ons gedagtes daarheen te laat gaan. Ons staan vas in die geloof dat hy dit sal maak.”

Teen Woensdag (21/1) het die dokters aan die paartjie gesê dit kan ongeveer tien dae neem om die volle spesialisspan byeen te bring wat vir die komplekse prosedure benodig word. “Dit is noodsaaklik dat elke betrokke dokter, verpleegster en personeellid van begin tot einde deel van die proses is, sodat almal die plan en elke stap van die operasie ten volle verstaan,” sê Geraldine.

 'n Gedetailleerde 3D-skandering van die baba se hart is ook gedoen om dokters te rig in besluite oor die beste pad vorentoe.

‘Die dokters sê daardie klein slagare is broos en moet glad nie beskadig word nie’

Die operasie behels die aorta en pulmonale arterie moet terug na die korrekte posisies verskuif word en die gat tussen die hartkamers toegemaak word – die einste opening wat Enzo tans aan die lewe hou. Die grootste risiko lê in die klein kransslagare wat aan die aorta geheg is, wat uiters broos is en nie tydens die prosedure beskadig moet word nie.

“Die dokters sê daardie klein slagare is broos en moet glad nie beskadig word nie. Dis hoekom hierdie operasie so gevaarlik is,” verduidelik David.

Ten spyte van die risiko’s het dokters dit duidelik gemaak die operasie sal moet plaasvind. Die dokters het die paartjie reeds voorberei op wat die uitkoms sal wees sou dit nie gebeur nie.

Geraldine van Zyl vra gebede vir hul wonderwerk-seuntjie. Foto verskaf

Enzo is tans stabiel en ontvang suurstof om die druk op sy hart te verminder terwyl dokters chirurgiese planne finaliseer. Daar is moontlik dat hy en sy ma na Kaapstad of Johannesburg oorgeplaas kan word, na gelang van die beskikbaarheid van spesialiste.

 “Dokters is steeds besig om al die planne saam te stel,” sê Geraldine. “Ons weet nog nie presies wat hulle gaan doen of wanneer nie, maar ons klein superheld gaan vir meer skanderings, en ons vertrou God met elke stap.”

Wat die emosionele spanning vererger, is Enzo se pa is tans op onbetaalde verlof sodat hy dag en nag langs sy seun se hospitaalbed kan wees. Die gesin word deur stygende uitgawes in die gesig gestaar vir reis, kos, verblyf en bababenodigdhede, asook mediese koste wat reeds by privaat instellings aangegaan is.

Fondse ingesamel

'n BackaBuddy-fonds is begin om te help met Enzo se mediese uitgawes en toekomstige behandeling. Teen Donderdagoggend (22/1) is R50 000 reeds ingesamel.

’n Nuutgestigte organisasie sonder winsoogmerk, Hands of Grace, is ook betrokke nadat hulle van Enzo se storie gehoor het. Hy is ’n kind uit hul eie gemeenskap, sê Chantelle van der Berg van Virginia.

“Die organisasie help die gesin met daaglikse behoeftes soos kos, petrol, doeke en ander noodsaaklikhede. Hoewel ’n afsonderlike fonds begin is om te help met huidige en toekomstige mediese koste, insluitend hospitaal- en moontlike chirurgiese uitgawes, bly baie van hierdie koste onseker.”

Op 7 Februarie hou die organisasie ’n boereworsroldag op Virginia om geld in te samel.

‘Hierdie is ons seuntjie en hy is ons alles’

“Hierdie is ons seuntjie en hy is ons alles,” sê Geraldine. “Ons enigste gebed op die oomblik is dat hy die operasie oorleef en saam met ons huis toe kom. Ons wil hom voor ons oë sien grootword. Ons wil hê hy moet ons eendag mal maak en vir ons grys hare gee.”

Die paartjie klou vas aan die Here en hul geloof. Geraldine haal Lukas 18:16 aan en sê hul geloof bly onwankelbaar. “Ons het ’n God van wonderwerke. Ons glo dat Hy die dokters se hande sal lei en ons klein vegtertjie volkome sal genees.

“Moet asseblief nie ophou bid nie.”

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe cvs