Die fees, wat wyd erken word vir sy grootskaalse kosuitdagings, sal poog om die rekord vir die grootste porsie pannekoek op te stel met ’n indrukwekkende 30 000 porsies. Nog ’n rekordpoging is om die wêreld se grootste chilli con carne te berei en voor te sit. Die mikpunt is om 3 t op perseel gaar te maak.

Albei rekordpogings op Saterdag 11 April by Emerald Resort & Casino op Vanderbijlpark word beplan as praktiese ervarings, wat feesgangers die kans gee om deel te neem in plaas van net te kyk. Dit weerspieël die geleentheid se sterk klem op eensgesindheid en ware gemeenskapsbetrokkenheid, sê Marinda Human, Emerald se bemarkingsbestuurder.

“Ná verlede jaar se prestasies is ons ongelooflik opgewonde oor vanjaar se uitdagings. Die omvang van die beplande Guinness World Record-poging en die vlak van gemeenskapsdeelname maak dié fees steeds iets werklik spesiaals vir die Vaal en die land.”

Verlede jaar het Rocking the Vaal in ’n enkele naweek drie wêreldrekords opgestel. ’n Enorme pot pap van 2 334 kg is gaargemaak, wat na raming 12 000 mense gevoed het.

Die fees het ook die grootste sosatie geskep – 'n allemintige 3 km lank en 1 674 kg swaar. Meer 2 000 mense het gelyktydig aan hierdie poging deelgeneem. Daarbenewens het 607 leerders van verskeie skole gelyktydig brood gebreek en ’n nuwe rekord opgestel.

Hierdie gedeelde kos-oomblikke is kragtig omdat dit mense op ’n baie werklike manier bymekaarbring, vertel Jaco Verwey, organiseerder van Rocking the Vaal en woordvoerder van die Goue Driehoek-sakekamer. Hulle het gehelp om Rocking the Vaal uit te bou tot ’n fees wat veel verder as musiek strek en betekenisvolle ervarings skep wat wyd aanklank vind.

Feesgangers kan ook uitsien na ’n vermaakprogram met Die Heuwels Fantasties, Demi Lee Moore, Droomsindroom, Kurt Darren, Karlien van Jaarsveld, Irene-Louise van Wyk, Refentse en Adam Tas.

* Het jy ’n nuuswenk om te deel? Bel of whatsapp die OFM Nuus-lyn:066 487 1427.

OFM Nuus