Die R30, ’n sleutelverbinding tussen Welkom en Theunissen, is gesluit nadat dele van die pad die afgelope paar dae weens reën oorstroom is. Owerhede waarsku toestande bly onveilig en motoriste moet die roete tot verdere kennisgewing vermy.

Die betrokke gedeelte van die R30 (ZR Mahabane) is onbegaanbaar as gevolg van gereelde oorstromings, sê Sipho Towa, voorsitter van die Vrystaatse padvoorvalbestuurstelsels,.

Die gedeelte waar die R30-pad oorstroom is. Foto verskaf

Hy sê die padinfrastruktuur is beskadig wat dit gevaarlik maak vir voertuie om daardeur te ry.

“Motoriste wat tussen Theunissen en Welkom reis moet van alternatiewe roetes gebruik maak. Diegene wat van Theunissen na Welkom op pad is moet die R30 (ZR Mahabane) in die rigting van die R730 via Virginia neem en dan voortgaan na Welkom. Motoriste van Welkom na Theunissen word aangeraai om die R730 deur Virginia te gebruik voordat hulle weer met die R30 na Theunissen gaan.”

Die oorstroming op die R30. Foto verskaf

Padgebruikers word versoek om alle padtekens te gehoorsaam en amptelike instruksies in die gebied te volg.

Towa sê die sluiting is nodig om openbare veiligheid te verseker omdat die huidige padtoestande aansienlike risiko’s inhou.

“Die situasie word gemonitor en opdaterings sal verskaf word soos toestande verbeter. Motoriste moet hul roete beplan en voorsiening maak vir ekstra reistyd,” sê Towa.

OFM Nuus/Charne van der Merwe dg

• Het jy ’n nuuswenk om te deel? Bel of whatsapp die OFM Nuus-lyn: 066 487 1427