Die voorval het glo in Maart in ’n koshuis in Kimberley plaasgevind. Die slagoffer én die verdagte is glo leerders by ’n skool vir spesiale behoeftes.

Volgens Cherelle Ehlers, provinsiale polisiewoordvoerder, het die voorval glo tussen Maart en 1 April plaasgevind. “Daar word geglo dat ’n seun (15) na bewering seksueel aangerand is deur ’n 17-jarige by ’n skoolkoshuis.”

Die slagoffer het glo sy ma van die voorval vertel, wat dit toe by die skoolbestuur aangemeld het, sê Ehlers. “Die beweerde voorval is by die polisie aangemeld en ’n verkragtingsondersoek is op 21 April geregistreer.

In Suid-Afrika bied die wet – veral die Wysigingswet op die Strafreg (Seksuele Misdrywe en Verwante Sake) – sterk beskerming aan slagoffers van seksuele misdrywe, veral kinders.

As jy of iemand wat jy ken so iets ervaar, is dit belangrik om so gou as moontlik op te tree:

• Vertel onmiddellik ’n vertroude volwassene. Dit kan ’n ouer, voog, onderwyser of skoolberader wees.
• Meld dit by die polisie aan. Jy kan na jou naaste polisiekantoor gaan of die polisie kontak. Gespesialiseerde eenhede soos die eenheid vir gesinsgeweld, kinderbeskerming en seksuele misdrywe (GVS) hanteer hierdie sake.
• Kry mediese sorg. Gaan so gou as moontlik na ’n kliniek of hospitaal. Mediese personeel kan sorg verskaf en belangrike bewyse insamel.
• Kontak ’n hulplyn vir ondersteuning. Organisasies soos Childline South Africa (bel 116) en Lifeline South Africa bied gratis, vertroulike ondersteuning.
• Moenie stilbly nie. Aanmelding help om jou te beskerm en kan skade aan ander voorkom.

OFM Nuus/Charne van der Merwe sm

• Het jy ’n nuuswenk om te deel? Bel of Whatsapp die OFM Nuus-lyn: 066 487 1427.