Gayton McKenzie tree op by die viering Saterdag (9/5) by die Oorlogsmuseum van die Boererepublieke in Bloemfontein. Die departement van sport, kuns en kultuur, die Oorlogsmuseum en die Vrystaatse provinsiale regering reël die geleentheid.

Die hoofdoel is om die diversiteit en rykdom van die Afrikaanse taal te vertoon. Die inisiatief volg op die mylpaal verlede jaar toe Afrikaans 100 jaar as amptelike taal gevier het.

Die verrigtinge, waar minister Gayton McKenzie na verwagting sal optree, begin om 10:00 op die terrein van die Oorlogsmuseum. Foto: Departement van sport, kuns en kultuur

Die departement sê die doel van die viering is om die belangrikheid van die bewaring van kulturele erfenis te beklemtoon. Deur die klem te laat val op taaldiversiteit wil die regering Afrikaans bevorder as ’n belangrike deel van die land se geskiedkundige en kulturele landskap.

Die program sal op verskeie maniere uitdrukking gee aan kultuur. Besoekers kan optredes en uitstallings verwag wat fokus op Afrikaanse musiek, letterkunde en teater. Daarbenewens sal aandag geskenk word op Afrikaanse komedie en tradisionele kos.

Die aktiwiteite is bedoel om ’n platform te bied vir nadenke oor die ontwikkeling van die taal. Boonop bied die museum, ’n nasionale entiteit van die departement, ’n geskiedkundige agtergrond vir die eeufeesaktiwiteite.

Stacey-Leey Khojane, woordvoerder van sport, kuns en kultuur, sê die geleentheid is in ooreenstemming met die nasionale mandaat om Suid-Afrika se diverse erfenis te ontwikkel en te beskerm. 

Dit bied ’n terugblik op die geskiedenis van die taal én gee ’n tree vorentoe vir die toekomstige ontwikkeling daarvan binne die grondwetlike raamwerk van die land.

Regeringsamptenare sê die byeenkoms sal ’n dieper begrip van plaaslike geskiedenis bevorder. Amptenare van die provinsiale regering en die departement van sport, kuns en kultuur woon dit ook by.

Die verrigtinge begin om 10:00 op die terrein van die Oorlogsmuseum. Lede van die media en die publiek kan dit bywoon.

OFM Nuus cvs

• Het jy ’n nuuswenk om te deel? Bel of whatsapp die OFM Nuus-blitslyn: 066 487 1427