Pottie Potgieter (65) het Maandag (11/5) gesterf toe sy huis in die voorstad Fauna aan die brand geslaan het. Sy liggaam is later in die slaapkamer gekry. Potgieter het alleen saam met sy hond gewoon.

Die brandweer is om 02:02 in kennis gestel van die brand by ’n huis in Lechwelaan en het binne 10 minute op die toneel aangekom, sê Braam van Zyl, afdelingshoof van Mangaung se brand-en-reddingsdiens. ’n Brandweerwa, ’n watertenkwa en agt brandbestryders is ontbied.

’n Buurvrou, wat verkies om anoniem te bly, sê hulle het geslaap toe hulle ’n harde slag hoor. “Eers het ek gedink miskien is ’n bank opgeblaas, maar toe besef ek daar is geen banke naby waar ons woon nie. 

“Net voor die ontploffing was my honde baie rusteloos in die huis. Toe my man by die venster uitkyk, was daar oral vlamme. Ons het na die huis gehardloop en amper gelyktydig met die polisie daar aangekom.”

Hulle het probeer om die deure oop te kry en die hond uit te kry om te sien of Potgieter leef, maar die vlamme was te erg, vertel sy. “Ongelukkig kon ons nie naby kom nie as gevolg van die vlamme.”

Die dak van die huis het ingeval. Foto Mangaung-metro se brandweer-en-reddingsdiens

Volgens van Zyl was die brand reeds in ’n gevorderde stadium toe hulle opdaag. "Bure het nooddienste in kennis gestel dat ’n man en sy hond nog binne die huis is. Die brand het in die slaapkamer begin en ’n deel van die dak het reeds ineengestort.”

Brandbestryders het onmiddellik begin om die vlamme te probeer blus terwyl ’n ander span die huis vir inwoners deursoek het, sê Van Zyl. “ ’n Hond is in die vertrek die verste van die brand gevind. Hy het nog geleef en is gered.”

Die dele van die huis wat in die brand verwoes is, is nie van die straat af sigbaar nie. Foto Charne van der Merwe

Noodspanne moes eers puin van die ineengestorte dak verwyder voordat hulle Potgieter se liggaam gevind het. Hy is op die slaapkamervloer aangetref.

“ ’n Gassilinder in die kamer het na bewering ontplof, hoewel dit onbekend is of die ontploffing die brand veroorsaak het of weens die brand (ontplof) het.”

Van Zyl sê die brand is binne ’n uur onder beheer gebring. Sowat 13 000 L water is gebruik.

Beamptes van die Parkweg-polisiekantoor se eenheid vir sigbare polisiëring was op patrollie toe hulle omstreeks 01:55 swaar rook gewaar het, sê lt.kol. Thabo Covane, provinsiale polisiewoordvoerder.

“Die slaapkamer en badkamer is heeltemal in puin gelê. Die kombuisplafon is ook deur die brand beskadig.”

Die polisie het ’n geregtelike doodsondersoek ná die voorval geopen.

OFM Nuus/Charne van der Merwe sm

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.