Robert Joubert (73), wat daarvan beskuldig word dat hy twee broers, Deon en Johnathan Fourie, ses maande gelede noodlottig geskiet het, het Maandag (11/5) in die Potchefstroomse streekhof verskyn.

Hy het aan ’n kliniese sielkundige gesê hy het uit selfverdediging opgetree omdat hy geglo het die mans het hom al dekades lank probeer vergiftig, berig die Potchefstroom Herald.

Hy staan tereg op twee aanklagte van moord vir die dood van die broers asook twee aanklagte van poging tot moord ná ’n skietery met veiligheidswagte by Chubby Chick in Potchefstroom.

Die twee broers was direkteure van die onderneming wat hulle by hul pa, John Fourie, oorgeneem nadat hy in 2023 oorlede is.

Deon (links) en Johnathan Fourie saam met hul pa, John. Foto verskaf

Die skietvoorval op 10 November het plaasgevind ná wat glo ’n vergadering oor ’n eiendomstransaksie tussen Joubert en die twee oorledenes was.

Die saak is tot 1 Julie uitgestel nadat die staat aangevoer het hy het nog nie die verdediging se sielkundige verslag ontvang nie en benadeel is in sy voorbereiding vir die verrigtinge.

Sielkundige Claire Hearne het Maandag getuig Joubert regverdig die noodlottige skietery. Hy het tydens ’n evaluering in Februarie herhaaldelik daarop aangedring hy het geen ander keuse gehad het as om die broers te skiet nie. “Dis óf ek óf hulle,” het sy hom aangehaal.

Hy sê die beweerde vergiftigingsveldtog het sowat 40 jaar gelede begin nadat hy die broers se pa in ’n straatwedloop geklop en hom verneder het. Die broers het hom glo later uit wraak begin teiken vir wat met hul pa gebeur het, het hy beweer.

Medies gewys gaan dit nie goed met Robert Joubert in die tronk nie. Foto verskaf

Joubert het aan haar gesê hy was jare lank onseker oor wie agter sy lyding was, maar ’n ontmoeting met die broers se ma het hom oortuig dat die familie hom heeltyd vergiftig het, het Hearne gesê. Die manier waarop sy hom gegroet het, het hom laat besef hulle was verantwoordelik.

’n Eksmeisie is glo omgekoop om hom te vergiftig, het hy beweer, wat hy glo tot ’n ernstige siekte en ’n hospitaalverblyf in Londen gelei het.

Tydens die sielkundige assessering was Joubert ook oortuig Novitsjok-gas is in die kamer vrygestel om hom te vergiftig. Joubert glo steeds hy word vergiftig terwyl hy in aanhouding is.

Sy het delusionele versteuring, algemene angsversteuring en paranoïese persoonlikheidsversteuring by hom gediagnoseer. Hearne het verdere psigiatriese waarneming en behandeling aanbeveel.

Joubert se gesondheid is ook in die hof bespreek. Hy het byna sy verskyning misgeloop omdat korrektiewe dienste nie ’n rolstoel beskikbaar gehad het nie en hy kon nie tydens die verrigtinge staan nie.

Die verdediging het verder versoek Joubert moet na ’n privaat hospitaal in Pretoria oorgeplaas word vir chirurgie aan sy arms en die verwydering van ’n gewas bo sy linkeroog, omdat hy glo nie voldoende behandeling ontvang nie.

OFM Nuus/Charne van der Merwe sm

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.