Daniel Fourie (60) kom na verwagting weer op 2 Julie in die streekhof in Welkom voor. Hy is sedert 7 April in aanhouding op Odendaalsrus, en die staat sal na verwagting sy borgtogaansoek teenstaan.

Fourie en sy vrou, Anna Francina (55), is op 7 April skuldig bevind aan meer as duisend aanklagte van intimidasie en crimen injuria ná ’n langdurige vete met die broers Manny en José Jardim.

Vonnisoplegging in die saak was aanvanklik vir 8 Junie beplan. Tydens die verrigtinge is Anna deur die hof gewaarsku nadat bykomende tyd versoek is om reëlings te tref vir die egpaar se gestremde kind (34).

Van die graffiti wat ter sprake is in die saak. Foto verskaf

Tydens sy getuienis is Fourie deur adv. Allen Simpson, staatsaanklaer, sowel as adv. Elias Radebe, sy regsverteenwoordiger, ondervra.

Maandag (25/5) het Fourie ’n dokument ingedien wat hy beweer deur die hooggeregshof in Bloemfontein uitgereik is. Hy het getuig die dokument bevestig dat hy die enigste persoon is wat gemagtig is om die finansiële sake van sy gestremde kind te bestuur.

Die staat het egter kommer uitgespreek en gevra waarom Fourie die hooggeregshof sou moes nader om geld te administreer wat hy self na bewering aan die kind gegee het.

’n Voorbeeld van die graffiti. Foto verskaf

Die egtheid van die dokument is ook deur die vervolging betwis. Simpson het die die hof meegedeel stappe sal gedoen word om te verifieer of die dokument eg is.

Fourie het steeds op die dokument staatgemaak om sy bewering te staaf dat hy al een is wat wettig gemagtig was om die geldsake van die egpaar se gestremde kind te bestuur.

Sedert die skuldigbevinding het die gesin se huislike omstandighede na bewering ál moeiliker geword. Anna is nou alleen verantwoordelik vir die versorging van hul gestremde kind.

“Die kind kan loop, maar hy kan nie homself aantrek, eet of die badkamer gebruik sonder hulp nie, en hy ly ook aan epilepsie,” het Fourie getuig.

Daniel Jacobus Fourie en sy vrou, Anna Francina, by die hof. Foto: Charné van der Merwe

Hul dogter moes haar studie vir eers staak om haar ma te help met die versorging van die kind en om verantwoordelikhede by die huis te bestuur, het hy getuig. Informele reëlings is glo getref sodat sy eendag haar studie kan hervat.

Die Fouries is na bewering ook onder ernstige finansiële druk nadat Fourie sy werk in 2019 verloor het. Gevra oor wie na die kind omgesien het terwyl hy en sy vrou gewerk het, het Fourie gesê dat hy op ’n rotasie van vier dae aan, vier dae af gewerk het.

Onder verdere ondervraging het dit egter onduidelik gebly wie konsekwent na die kind omgesien het toe beide ouers by die werk was.

Fourie het getuig die gesin kon nie ’n gekwalifiseerde versorger vir hul seun bekostig nie. “Die kind moet vertroud wees met sy versorger, en die versorger met sy roetines, aangesien dit moeilik is vir ’n vreemdeling om sy spesifieke behoeftes en gedragspatrone te bestuur.”

Hy het aangevoer die plaas wat hy bedryf, is in die naam van die gestremde seun geregistreer. Hy het glo aangehou om die eiendom te bestuur en te bewerk omdat die kind nie vir homself kon sorg of toesig oor die plaas se bedrywighede hou nie.

‘Ontken strykdeur skuld’

Terwyl hy in aanhouding was, is diere na bewering van die plaas gesteel, wat hy as nog ’n probleem genoem het wat die gesin tydens sy afwesigheid ervaar het.

Fourie ontken strykdeur skuld aan al die oortredings waarop hy skuldig bevind is. Hy het meermale gesê hy beplan om ná vonnisoplegging te appelleer. Die staat het blykbaar nie ’n sterk saak teen hom nie, het hy gesê, en het talle getuies gekritiseer wat tydens die verhoor geroep is.

Anna en die ondersoekbeampte, kol. Ben Strydom, sal na verwagting op 2 Julie getuig.

OFM Nuus/Charne van der Merwe dg

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.