Jayren Horn leef al langer as vier jaar met tipe 1-diabetes. Sy ma, Juanita, doen alles in haar vermoë om hom te help om, ondanks sy siekte, steeds gelukkige kinderjare te hê.

Toe Jayren net 13 maande oud was, het sy ouers begin agterkom iets skeel. Hy was baie moeg, wou net heeltyd lê, het aanhoudend vog ingeneem en moes gereeld badkamer toe gaan. Hulle het geweet iets is fout, maar was nie voorbereid op die diagnose wat sou volg nie.

Die erns van sy toestand het eers behoorlik tot die gesin deurgedring toe hy in die intensiewesorgeenheid opgeneem is. “My klein seuntjie moes leer om met inspuitings, bloedtoetse, ’n sensor en voortdurende bloedsuikerbeheer saam te leef.”

Jayren Horn net ná sy diagnose. Foto verskaf

Vandag is diabetes deel van byna elke oomblik van sy lewe. Wanneer sy bloedsuiker te laag daal, word hy swak en moeg. Daar is dae wat hy ná skool vir sy ma vertel hoe moeg hy gevoel het omdat sy suiker gedaal het, terwyl hoë bloedsuiker weer sy eie uitdagings bring.

Die diagnose het egter meer as net mediese uitdagings gebring. Juanita worstel ook met die vrae van haar seuntjie wat probeer verstaan waarom hy anders as sy maats moet leef.

“Hoekom moet ek ’n sensor dra? Hoekom moet ek ’n spuit kry? Hoekom mag ek nie ’n gewone koeldrank drink nie?”

Sy probeer egter om so goed as moontlik aan hom te verduidelik waarom sy liggaam anders werk, en herinner hom gereeld dat diabetes nie bepaal wie hy is nie. En Jayren weier om dit te doen.

“Hy wil net speel, lag, sport doen en saam met sy maats wees. Hy verstaan nie waarom sy lewe anders lyk nie. Hy is ’n sagte, liefdevolle en vriendelike kind met ’n ongelooflik groot hart wat altyd bereid is om met ander te deel.”

Saam met sy siekte is daar ook ’n groot geldelike las wat die gesin moet dra. Jayren het deurlopende mediese sorg, insulien, sensors en gereelde doktersbesoeke nodig. Daar is ook uitstaande mediese rekeninge en bybetalings, asook ’n spesiale dieet wat hy moet volg.

Jayren wil ook graag soos ander kinders sport beoefen. Foto verskaf

Om bykomende inkomste te probeer verdien, verkoop Juanita en haar skoonma tuisgemaakte produkte soos koekies, tamatiekonfyt en mosterd. “Dit bring nie baie in nie, maar elke bietjie help.”

Die gesin se grootste bekommernis is egter Jayren se gesondheid op die lang termyn. Sy gemiddelde bloedsuikervlak is tans ongeveer 13, terwyl dit nader aan sewe behoort te wees. Sy oogdokters het ook beklemtoon hoe belangrik goeie beheer van sy diabetes is om sy sig en toekomstige welstand te beskerm.

“Ons hoop net vir ’n lewe waarin Jayren kan speel, sport doen, saam met sy vriende wees, lag en bloot ’n vyfjarige seuntjie kan wees,” sê Juanita.

OFM Nuus/Charne van der Merwe  cvs

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.