Die sesde Kalahari Kunstefees word van 3 tot 5 Desember aangebied op die plaas Erin, naby Askham. Khoi- en San-kunstenaars van Suid-Afrika, Botswana en Namibië kom saam vir die viering.

“Die program sluit in tradisionele musiek en dans, kunsvlyt, inheemse kos, meesterklasse, slypskole, storievertelling om die kampvuur en begeleide staptogte saam met tradisionele San-spoorsnyers,” sê Helena Steenkamp, feesdirekteur.

Die aande sal gevul wees met kampvuurvertonings en gewilde platejoggies, asook sterrekyksessies waarin sowel die sterrekunde as San-kosmologie verken sal word. Besoekers kan ook sandplankry en vierwielmotorfietsuitstappies deur die duine geniet, teen die agtergrond van die Kalahari se uitgestrekte landskap.

“Die fees se fokus strek verder as die jaarlikse viering. Die doel is om kunstenaars te help om hul werk te bemark en ’n volhoubare inkomste te verdien. Wat ons het, is kulturele skatte. 

“Dit is ons geldeenheid en ons trots. Die fees bied ons ’n platform om hierdie skatte te vier en ten toon te stel, maar ons ambisie strek veel verder. Ons wil geleenthede skep sodat kunstenaars toegang tot markte kan kry, hul ondernemings kan ontwikkel en ook buite die fees inkomste kan genereer.”

Die fees plaas  inheemse erfenis en kunstenaars in die kern van die kreatiewe ekonomie. Foto verskaf

Steenkamp sê Khoi-, San- en ander gemarginaliseerde kunstenaars beskik oor buitengewone kulturele kennis, maar staan histories dikwels op die rand van die formele kreatiewe ekonomie. “Ons glo hierdie kennis verdien erkenning, beskerming en betekenisvolle ekonomiese waarde. Die fees groei tot ’n platform wat kan help om verandering teweeg te bring.”

“Die fees dien as ’n baanbrekende uitruilplatform vir kunstenaars uit Suid-Afrika, Botswana en Namibië. ’n Digitale platform word ontwikkel om kunstenaars deur die jaar met gehore, kopers en medewerkers te verbind en hul sigbaarheid en inkomstegeleenthede te vergroot,” sê sy.

Die fees word moontlik gemaak deur vennote soos die departement van sport, kuns en kultuur, die Nasionale Loterykommissie en die Nasionale Kunsteraad. Hul ondersteuning maak gratis toegang tot die fees moontlik.

Aangesien Desember deel van die Kalahari se warm seisoen is, word besoekers aangeraai om ligte klere en muskietafweermiddels saam te bring. Feesgangers kan die fees se amptelike kanale volg vir bevestigde programbesonderhede en verdere aankondigings.

OFM Nuus/Charne van der Merwe dg

• Het jy ’n nuuswenk om te deel? Bel of whatsapp die OFM Nuus-lyn 066 487 1427.