On Now
Weekdays 09:00 - 12:00
Mid-Morning Magic Yolanda
Show Background
NEXT: 12:00 - 15:00 At Lunch with Pulane
Listen Live Streams

Central SA

Ongeluk by Koppies: Vermiste se familie soek WhatsApp-getuie

───   11:01 Tue, 17 Nov 2026

Ongeluk by Koppies: Vermiste se familie soek WhatsApp-getuie | News Article
Die vermiste Hugo du Preez. Foto’s verskaf

Die familie van ’n man wat agt maande gelede spoorloos naby Koppies in die Vrystaat verdwyn het, hoop ’n WhatsApp kan help om die raaisel rondom sy verdwyning op te klaar.

Hugo du Preez (toe 43) was op 14 Maart van Kroonstad na Gauteng op pad toe hy vermis geraak het. Sy wit Volkswagen Polo is sowat 22 km van Koppies in die rigting van die Vaalrivier langs die N1 gevind nadat dit klaarblyklik in ’n ongeluk betrokke was.

Missing Person South Africa sê in ’n Facebook-inskrywing Du Preez se selfoon, beursie, skootrekenaar, klere en ander persoonlike besittings was steeds in die motor. Sy familie sê daar was sedert sy verdwyning geen bedrywighede op sy rekeninge nie.

Die familie probeer veral die persoon opspoor wat kort ná sy verdwyning glo in ’n WhatsApp-groep geskryf het dat hy Du Preez sien loop het. Die polisie vermoed die persoon is ene John, hoewel dit nog nie bevestig is nie.

Hugo du Preez se jong seun is vertel sy pa is in die buiteland. Foto verskaf

“Die familie hoop dat die opsporing van dié moontlike getuie kan help om Hugo se bewegings vas te stel nadat sy voertuig gevind is,” sê die organisasie vir vermiste mense.

Du Preez se familie het intussen ook kommer uitgespreek oor die polisieondersoek. Hulle sê hulle het tydens ’n ondersoek van sy motor vlekke opgemerk wat vermoedelik bloed was. Hulle het dit privaat laat toets en sê die toetsuitslag was positief vir bloed.

Dit is egter nie bekend wie se bloed dit was of hoe dit in die motor beland het nie. Missing Person South Africa benadruk dat hy nie die toetsuitslae onafhanklik bevestig het nie.

Die familie wil ook weet of die polisie vingerafdrukke in die motor geneem en sekere moontlike getuies opgespoor het. Hulle erken dat sommige ondersoekstappe moontlik sonder hul medewete gedoen is.

Intussen berei die familie hulle voor op ’n Kersfees sonder Du Preez. Sy jong seun verjaar op 2 Desember. Hy is vertel sy pa is in die buiteland.

Du Preez is tussen 1,6 m en 1,7 m lank, het bruin hare, blou oë en ’n grys baard. Hy het tatoeëermerke van ’n dolfyn en ’n oog aan sy arms en ’n vis aan sy kuit.

Enigiemand met inligting kan die ondersoekbeampte, kapt. Theresa Lategan van die Koppies-polisie, by 082 466 7966 of Missing Person South Africa by 068 176 9574 bel.

OFM Nuus cvs

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.

@ 2026 OFM - All rights reserved Disclaimer | Privacy Policy | We Use Cookies - OFM is a division of Central Media Group (PTY) LTD.