Inspiration
Groot aspirasies vir jong kankerpasiënt van Bloemfontein─── KEKELETSO MOSEBETSI 08:51 Thu, 15 Feb 2024
“My wêreld het verlede jaar omgekeer toe ek hoor dat my seun kanker het.”
’n Negentienjarige kankerpasiënt droom daarvan om een van die beste polisiebeamptes in die land te word.
Teboho Khojane, wat in Fase 6 in Bloemfontein woon, vertel hy is verpletter nadat testikulêre kanker verlede jaar by hom gediagnoseer is. Die tienerseun het probleme ondervind en het siek geword toe hy in September van ’n skooluitstappie teruggekom het. Toetse is gedoen en hy is meegedeel dat hy kanker het.
Sy ma, Matsepo Khojane, sê aan OFM Nuus haar lewe was nog nooit dieselfde sedert haar seun se kankerdiagnose nie, maar sy was sterk vir haar seun toe dokters hulle in kennis stel. “My wêreld het verlede jaar omgekeer toe ek hoor dat my seun kanker het. Ek het selfs siek geword, maar met ondersteuning van sy pa het ek vir myself gesê ek moet sterk wees vir my seun.”
Matsepo Khojane (37) met haar seuns, Teboho Khojane (19) en Nlanhla Khojane (2) by hul fase 6 huis. Foto: Kekeletso Mosebetsi
Sy vertel dat sy eenkeer blase op haar maag gehad het en Teboho, wat net twee maande oud was, moes ophou borsvoed. Die blase het in sy testikels verskyn, maar die dokters het vir haar gesê dit is niks ernstigs nie, en het vir hulle medisyne gegee wat hulle gesond gemaak het. Teboho het weer blase in sy testikels gehad toe hy vyf jaar was, maar dit het sonder enige uitdagings genees.
Teboho vertel hy het krag gekry uit die ondersteuning wat hy van ouers, familielede, sy meisie en vriende gekry het en ook dokters se versekering dat hy sou genees. Wat hom geïnspireer het om ’n polisiebeampte te word, is die hoë misdaadsyfer wat hy in sy omgewing sien.
‘Hy is bekommerd sy vriende sal hom anders behandel’
Teboho sê hy geniet dit om sokker te speel en word geïnspireer deur mense soos die voormalige Orlando Pirates-speler Thembi Nkosi Lorch.
Sy daaglikse roetine het nie veel verander sedert sy diagnose nie. Hy bring egter nou minder tyd saam met vriende deur omdat hy bekommerd is hulle sal hom anders behandel. Hy het vriende gemaak met ’n bejaarde vrou wat ook ’n kankerpasiënt is waar hulle saam chemoterapie kry.
